പത്തനംതിട്ട : സാമൂഹികപ്രവർത്തക ഡോ.എം.എസ്.സുനിൽ ഭവനരഹിതരായി സുരക്ഷിതമല്ലാത്ത കുടിലുകളിൽ കഴിയുന്ന നിരാലംബർക്ക് പണിത് നൽകുന്ന 251 – മത് സ്നേഹ ഭവനം വിദേശ മലയാളിയായ അജീഷ് എബ്രഹാമിന്റെ സഹായത്താൽ തിരുവില്വാമല കണിയാർകോട് കുന്നത്ത് വീട്ടിൽ സുധക്കും കുടുംബത്തിനുമായി നിർമ്മിച്ചു നൽകി. വീടിന്റെ താക്കോൽ ദാനവും ഉദ്ഘാടനവും അജീഷ് ഏബ്രഹാമും ഭാര്യ സാൽവിയ തോമസും ചേർന്ന് നിർവഹിച്ചു.
വർഷങ്ങളായി സ്വന്തമായി വീടില്ലാത്ത അവസ്ഥയിൽ സുരക്ഷിതമല്ലാത്ത സാഹചര്യത്തിൽ കഴിയുകയായിരുന്നു സുധയും ഭർത്താവ് പ്രകാശനും ഏക മകനും അടങ്ങിയ കുടുംബം. ഇവരുടെ അവസ്ഥ മാധ്യമപ്രവർത്തകനായ അരുൺ എഴുത്തച്ഛനാണ് ടീച്ചറുടെ ശ്രദ്ധയിൽപ്പെടുത്തിയത്. ഇവർക്കായി രണ്ട് മുറികളും ഹാളും അടുക്കളയും ശുചിമുറി യും സിറ്റൗട്ടും അടങ്ങിയ ഒരു വീട് നിർമ്മിച്ച് നൽകുകയായിരുന്നു. ചടങ്ങിൽ പ്രോജക്ട് കോഡിനേറ്റർ കെ.പി. ജയലാൽ, രാധാകൃഷ്ണൻ ആർ, അനിൽകുമാർ എന്നിവർ പ്രസംഗിച്ചു.
