പത്തനംതിട്ട : സാമൂഹിക പ്രവർത്തക ഡോ. എം.എസ്. സുനിൽ ഭവനരഹിതരായി സുരക്ഷിതമല്ലാത്ത കുടിലുകളിൽ താമസിക്കുന്ന നിരാലംബർക്ക് പണിതു നൽകുന്ന 330- മത് സ്നേഹഭവനം കുമാരി മാത്യുവിന്റെ സഹായത്താൽ ഊന്നുകള് വാലുതറ ശിവകാശി വീട്ടിൽ സൂര്യയ്ക്കും ശരത്തിനും 3 കുഞ്ഞുങ്ങൾക്കുമായി നിർമ്മിച്ചു നൽകി. വീടിന്റെ താക്കോൽദാനം കുമാരിയുടെ സഹോദരി ബെറ്റി വർഗീസും ഭർത്താവ് വർഗീസ് മാപ്പിളയും ചേർന്ന് നിർവഹിച്ചു. വർഷങ്ങളായി സ്വന്തമായി വീട് വെയ്ക്കുവാൻ നിവർത്തിയില്ലാതെ ഇടിഞ്ഞു പൊളിയാറായ യാതൊരു സുരക്ഷിതത്വവും ഇല്ലാത്ത ഒരു ചെറിയ കുടിലിൽ ആയിരുന്നു സൂര്യയുടെയും കുടുംബത്തിന്റെയും താമസം.
ചോർന്നൊലിക്കുന്ന കുടിലിൽ ദുരിത ജീവിതം നയിച്ചിരുന്ന ഇവരുടെ അവസ്ഥ നേരിൽ കണ്ട് മനസ്സിലാക്കിയ സുനില് ടീച്ചർ ഇവർക്കായി രണ്ട് മുറികളും അടുക്കളയും ഹാളും ശുചി മുറിയും സിറ്റൗട്ടും അടങ്ങിയ 650 സ്ക്വയർ ഫീറ്റ് വലിപ്പമുള്ള വീട് നിർമ്മിച്ചു നൽകുകയായിരുന്നു. ചടങ്ങിൽ വാർഡ് മെമ്പർമാരായ ലീലാ കേശവൻ, അന്നമ്മ ജിജി, പ്രൊജക്റ്റ് കോഡിനേറ്റർ കെ. പി. ജയലാൽ, ജോൺസൺ എന്നിവർ പ്രസംഗിച്ചു. കുമാരി മാത്യുവിന്റെ സഹായത്താൽ സഹായത്താൽ പണിയുന്ന മൂന്നാമത്തെ വീടാണ് ഇവർക്കായി ഇന്ന് നൽകിയത്.
