ന്യൂഡല്ഹി : എന്ഡിഎയുടെ രാഷ്ട്രപതിസ്ഥാനാര്ത്ഥി ദ്രൗപദി മുര്മു ഇന്ന് നാമനിര്ദേശ പത്രിക സമര്പ്പിക്കും. പ്രധാനമന്ത്രി നരേന്ദ്രമോദി ഉള്പ്പെടെയുള്ള നേതാക്കള് ദ്രൗപദി മുര്മുവിനെ അനുഗമിക്കും. എന്ഡിഎ സഖ്യകക്ഷികള്ക്കും മുഖ്യമന്ത്രിമാര്ക്കും ചടങ്ങില് ക്ഷണമുണ്ട്. പത്രികയില് പ്രധാനമന്ത്രി മോദിയാകും മുര്മുവിന്റെ പേര് നിര്ദേശിക്കുക. ബിജെപി അധ്യക്ഷന് ജെ.പി നദ്ദ പിന്താങ്ങും. ജാര്ഖണ്ഡ് മുന് ഗവര്ണറും ആദിവാസി ഗോത്ര വിഭാഗത്തില്നിന്നുള്ള വനിതാ നേതാവുമാണ് ദ്രൗപദി മുര്മു. ഒഡീഷ സ്വദേശിയാണ് ദ്രൗപതി മുര്മ്മു.
ഒഡീഷിയിലെ മയൂര്ഭഞ്ച് ജില്ലയില് നിന്നുമാണ് മുര്മു സംസ്ഥാന രാഷ്ട്രീയത്തിലേക്ക് പ്രവേശിക്കുന്നത്. അതിന് മുമ്പ് അധ്യാപികയായിരുന്നു. മയൂര്ഭഞ്ചിലെ റൈരംഗ്പൂരില് നിന്ന് (2000, 2009) ബിജെപി ടിക്കറ്റില് അവര് രണ്ടുതവണ എംഎല്എയായിട്ടുണ്ട്. 2000ത്തില് അധികാരത്തിലെത്തിയ ബി.ജെ.പി ബി.ജെ.ഡി സഖ്യസര്ക്കാരിന്റെ കാലത്ത് അവര് വാണിജ്യം, ഗതാഗതം, തുടര്ന്ന് ഫിഷറീസ്, മൃഗസംരക്ഷണ വകുപ്പുകള് കൈകാര്യം ചെയ്തു. 2009ല് ബി.ജെ.ഡി ഉയര്ത്തിയ വെല്ലുവിളിക്കെതിരെ ബി.ജെ.പി പരാജയപ്പെട്ടപ്പോഴും അവര്ക്ക് വിജയിക്കാന് കഴിഞ്ഞു
