കോന്നി : വേനൽ ചൂടിൽ കുടിവെള്ളം ലഭിക്കാതെ വലയുന്ന പക്ഷികൾക്ക് ആശ്വാസം പകരുന്നതാണ് കോന്നി ഇക്കോ ടൂറിസം സെന്ററിലെ വനം വകുപ്പ് ജീവനക്കാരുടെ പ്രവർത്തനം. ഇക്കോ ടുറിസം കേന്ദ്രത്തിൽ എത്തുന്ന പക്ഷികൾക്ക് മൺചട്ടിയിൽ വിവിധ മരച്ചില്ലകളിലായി ദാഹജലം ഒരുക്കിയാണ് വനപാലകർ മാതൃകയായത്. ടൂറിസം കേന്ദ്രത്തിന് ഉള്ളിൽ മാത്രമല്ല കോന്നിയിലെ നിരവധി വീടുകളുടെ പരിസരത്തും ഇത്തരത്തിൽ ദാഹജലം ഒരിക്കിയിട്ടുണ്ട്. മുപ്പത്തിലധികം മൺചട്ടികൾ ആണ് വിവിധ സ്ഥലങ്ങളിൽ ആയി സ്ഥാപിച്ചിരിക്കുന്നത്.
ബീറ്റ് ഫോറെസ്റ്റ് ഓഫീസർ ഹാഷിമിന്റെ നേതൃത്വത്തിൽ ആണ് പ്രവർത്തനങ്ങൾ. കുടിവെള്ളം നിറക്കാൻ തയ്യാറാക്കിയ മൺ ചട്ടികൾ വിവിധ സ്ഥലങ്ങളിൽ സ്ഥാപിക്കാൻ പൊതു ജനങ്ങൾക്ക് വിതരണം ചെയ്യുകയും ചെയ്തു. വേനലിൽ ദാഹജലം ലഭിക്കാതെ പക്ഷികൾ ചത്തൊടുങ്ങുന്ന സംഭവങ്ങൾ വർധിക്കുന്നുണ്ടെന്നും അത്തരത്തിലുള്ള സംഭവങ്ങൾ ശ്രദ്ധയിൽ പെട്ടത് മൂലമാണ് ഇത്തരം ഒരു ആശയത്തിലേക്ക് നയിച്ചതെന്നും വനപാലകർ പറഞ്ഞു. വരും വർഷങ്ങളിലും പദ്ധതി കൂടുതൽ വ്യാപിപ്പിക്കാനാണ് ഇവർ ലക്ഷ്യമിടുന്നത്.
