തിരുവനന്തപുരം: സംസ്ഥാനത്തെ എല്ലാ പോലീസ് ജില്ലകളിലും ഡ്രോണ് നിരീക്ഷണ സംവിധാനം ഏര്പ്പെടുത്തിയ രാജ്യത്തെ ആദ്യ സംസ്ഥാനമായി കേരളം. എല്ലാ ജില്ലകളിലേക്കും ഡ്രോണുകളും പ്രത്യേക പരിശീലനം നേടിയ ഡ്രോണ് പൈലറ്റുമാര്ക്കുള്ള ലൈസന്സും ഇന്ന് നടന്ന ചടങ്ങില് മുഖ്യമന്ത്രി പിണറായി വിജയന് വിതരണം ചെയ്തു. ഒപ്പം തദ്ദേശീയമായി വികസിപ്പിച്ച ആന്റി ഡ്രോണ് സോഫറ്റ് വെയറും അദ്ദേഹം പുറത്തിറക്കി.
ഡ്രോണുകളുടെ ഉപയോഗം വര്ദ്ധിക്കുന്നതിനാല് അവയുടെ പ്രവര്ത്തനത്തിന് പ്രത്യേകം വ്യവസ്ഥകള് ആവശ്യമാണെന്നും മുഖ്യമന്ത്രി വ്യക്തമാക്കി. നിരീക്ഷണ ഡ്രോണുകള് പോലീസിന്റെ ആധുനികവത്ക്കരണത്തില് വലിയ ചുവടായി മാറുമെന്ന് മുഖ്യമന്ത്രി പറഞ്ഞു. വിവിധതരം ഡ്രോണ് ഓപ്പറേഷനുകള് നടത്തുന്നതിനായി ജില്ലകളില് നിന്ന് തെരഞ്ഞെടുത്ത് ഡി.ജി.സി.എ സര്ട്ടിഫൈഡ് ഡ്രോണ് പൈലറ്റ് പരിശീലനം നേടിയ 25 പോലീസ് ഉദ്യോഗസ്ഥര്ക്കുളള സര്ട്ടിഫിക്കറ്റുകളും ചടങ്ങില് വിതരണം ചെയ്തു.
