പാലക്കാട് : പെരിങ്ങോട്ട് കുറിശ്ശി ഭാരതപ്പുഴയിലെ ഞാവളം കടവില് വിദ്യാര്ഥി ഒഴുക്കില്പ്പെട്ട് മുങ്ങി മരിച്ചു . മുഹമ്മദ് അസീസിന്റെ മകന് അന്സില് (18) ആണ് മരിച്ചത്. സംസ്ഥാന വ്യാപകമായി പലയിടത്തും മഴക്കെടുതികള് തുടരുകയാണ്. അടുത്ത മൂന്ന് മണിക്കൂറില് സംസ്ഥാനത്ത് പരക്കെ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം അറിയിപ്പുണ്ട്.
വൈകിട്ട് 3.30 ഓടെ കൂട്ടുകാരനൊപ്പം പുഴക്കരുകില് എത്തിയ അന്സില് കാല് വഴുതി വീഴുകയായിരുന്നു. പോലീസും ഫയര്ഫോഴ്സും നാട്ടുകാരും നടത്തിയ തെരച്ചിലില് വൈകിട്ട് ആറരയോടെയാണ് മൃതദേഹം കണ്ടെത്തിയത്. കനത്ത മഴയെത്തുടര്ന്ന് പുഴയില് നീരൊഴുക്ക് കൂടുതലാണ്.
പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട്, വയനാട്, കണ്ണൂര് എന്നിങ്ങനെ എട്ട് ജില്ലകളില് ഓറഞ്ച് അലര്ട്ടാണ്. മറ്റ് ജില്ലകളില് യെല്ലോ അലര്ട്ടാണ് പ്രഖ്യാപിച്ചിരിക്കുന്നത്. മലയോര മേഖലകളിലാണ് കൂടുതല് മഴയ്ക്ക് സാധ്യത. രാത്രിയോടെ മഴ കനക്കുമെന്നാണ് കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ്.
