തിരുവനന്തപുരം : വെണ്ണല സ്വദേശി അനൂപ് മുഹമ്മദും തന്റെ മകന്‍ ബിനീഷ് കോടിയേരിയും തമ്മില്‍ ബന്ധമുണ്ടെന്ന വാര്‍ത്തകളോടു പ്രതികരിച്ച്‌ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. ബിനീഷ് തെറ്റുകാരനെങ്കില്‍ സംരക്ഷിക്കില്ലെന്ന് പറഞ്ഞ കോടിയേരി ആരോപണങ്ങളുടെ വിശദാംശങ്ങള്‍ തനിക്കറിയില്ലെന്നും പുകമറ സൃഷ്ടിക്കാനുള്ള ശ്രമങ്ങള്‍ക്ക് അല്‍പായുസ്സ് മാത്രമേ ഉണ്ടാകൂ എന്നും അറിയിച്ചു.
കേന്ദ്ര ഏജന്‍സികള്‍ എല്ലാ കാര്യവും അന്വേഷിക്കട്ടെ. തെളിവുണ്ടെങ്കില്‍ പ്രതിപക്ഷ നേതാവ് രമേശ് ചെന്നിത്തല അന്വേഷണ ഏജന്‍സികള്‍ക്കു കൈമാറണം. തെറ്റുകാരനെങ്കില്‍ നിയമനടപടി സ്വീകരിക്കട്ടെ. ശിക്ഷിക്കപ്പെടേണ്ടതാണെങ്കില്‍ ശിക്ഷിക്കട്ടെ. തൂക്കിക്കൊല്ലേണ്ട കുറ്റമാണെങ്കില്‍ തൂക്കിക്കൊല്ലട്ടെ. തന്നെ മാനസികമായി തകര്‍ക്കാനാണ് ശ്രമമെങ്കില്‍ അതു നടക്കില്ല. ഇതെല്ലാം നേരിടാന്‍ തയാറായിട്ടാണ് ഒരു കമ്യൂണിസ്റ്റുകാരനായി ജീവിക്കുന്നത്. ഒരു കമ്യൂണിസ്റ്റുകാരന്‍ പല തരത്തിലുമുള്ള ആക്രമണം നേരിടേണ്ടി വരും. സര്‍ക്കാരിനു കീഴില്‍ ക്രമസമാധാന നില ഭദ്രമാണ്. കേരളത്തില്‍ അരക്ഷിതാവസ്ഥ സൃഷ്ടിക്കാന്‍ ശ്രമം നടക്കുകയാണെന്നും കോടിയേരി ആരോപിച്ചു.
രക്തസാക്ഷികളെ ഗുണ്ടകളെന്നു പറഞ്ഞ് അധിക്ഷേപിക്കുകയും കൊലപാതകികളെ മഹത്വവല്‍ക്കരിക്കുകയും ചെയ്യുന്ന സമീപനമാണ് കോണ്‍ഗ്രസ് സ്വീകരിച്ചിരിക്കുന്നത്. എന്ത് അക്രമം വേണമെങ്കിലും നടത്തിക്കൊള്ളൂ, ഞങ്ങള്‍ നിങ്ങളെ നോക്കിക്കൊള്ളാമെന്ന് അക്രമകാരികള്‍ക്ക് പരസ്യ പിന്തുണയാണ് യുഡിഎഫ് നല്‍കിയിരിക്കുന്നത്. വെഞ്ഞാറമൂട്ടില്‍ രണ്ടു ഗുണ്ടാസംഘങ്ങള്‍ തമ്മിലുള്ള ഏറ്റുമുട്ടലാണെന്നു പ്രചരിപ്പിക്കാനാണ് കോണ്‍ഗ്രസ് നേതൃത്വം ശ്രമിക്കുന്നത്. അക്രമം നടത്തിയവരെ തള്ളിപ്പറയാന്‍പോലും കോണ്‍ഗ്രസ് തയാറായില്ല. കോണ്‍ഗ്രസിന്റെ നിലപാട് അത്യധികം അപലപനീയമാണ്. മഹാത്മാ ഗാന്ധിയുടെ ഫോട്ടോയ്ക്കു മുന്നില്‍ വച്ചാണ് പ്രവര്‍ത്തകരെ വെട്ടിക്കൊന്നത്. ഇന്നത്തെ കോണ്‍ഗ്രസ് ചെന്നുപെട്ട അപചയത്തിന്റെ തെളിവാണ് വെഞ്ഞാറമൂട് കൊലപാതകമെന്നും കോടിയേരി പറഞ്ഞു.
