നാഗര്‍കോവില്‍: ലഹരിക്ക് അടിമയായ യുവാക്കള്‍ക്ക് പെണ്‍കുട്ടികളെ എത്തിച്ചു കൊടുത്തിരുന്ന കോളേജ് വിദ്യാര്‍ത്ഥിനിയുടെ തല തല്ലിപ്പൊളിച്ച്‌ കാമുകന്‍.കന്യാകുമാരി കുളച്ചലില്‍ പെണ്‍കുട്ടിയുടെ താമസസ്ഥലത്ത് ഉണ്ടായ ആക്രമണം കഞ്ചാവ് ഉപയോഗത്തിന്റെ തുടര്‍ച്ചയാണെന്നാണ് പോലീസ് അന്വേഷണത്തില്‍ കണ്ടെത്തിയത്. കുളച്ചലിലെ സ്വകാര്യ കോളേജില്‍ പഠിക്കുന്ന നാഗര്‍കോവില്‍ സ്വദേശിനിക്കാണ് ഗുരുതരമായി പരിക്കേറ്റത്. പരിക്കുകളോടെ ആശുപത്രിയില്‍ ചികിത്സ തേടിയപ്പോഴാണ് ലഹരിയുടെ മറവില്‍ നടന്ന ലൈംഗിക ചൂഷണത്തെ കുറിച്ച്‌ പോലീസിന് വിവരം ലഭിച്ചത്.
കാമുകനായ അജിനാണ് ആക്രമിച്ചത് എന്നായിരുന്നു പെണ്‍കുട്ടി ആദ്യം പോലീസിന് മൊഴി നല്‍കിയത്. എന്നാല്‍ അജിന്റെ അമ്മയെ വിളിച്ച്‌ മറ്റൊരു പെണ്‍കുട്ടി ആക്രമണത്തിന്റെ കാരണങ്ങള്‍ വ്യക്തമാക്കിയിരുന്നു. യുവാക്കള്‍ക്കൊപ്പം കഞ്ചാവ് ഉപയോഗിക്കാന്‍ കോളേജ് വിദ്യാര്‍ത്ഥിനികളെ എത്തിച്ചു നല്‍കുന്ന സംഘത്തിലെ അംഗമായിരുന്നു ആക്രമണത്തിന് ഇരയായ പെണ്‍കുട്ടി. ലഹരിക്കടിമകളാക്കി ഈ പെണ്‍കുട്ടികളെ ലൈംഗിക ചൂഷണം നടത്തുകയാണ് ഇവരുടെ പതിവ്.
കഴിഞ്ഞ ദിവസം പിറന്നാള്‍ ആഘോഷത്തിന്റെ പേരില്‍ രണ്ട് യുവാക്കള്‍ ആക്രമണത്തിന് ഇരയായ പെണ്‍കുട്ടിയുടെ വീട്ടില്‍ എത്തിയിരുന്നു. ഇതറിഞ്ഞെത്തിയ കാമുകനായ അജിന്‍ യുവാക്കളെ തല്ലിയോടിക്കുകയും തടസ്സം നിന്ന കാമുകിയുടെ തലയടിച്ച്‌ പൊട്ടിക്കുകയുമായിരുന്നു. ലൈംഗികചൂഷണം നടത്താന്‍ ശ്രമിച്ചവരെയാണ് താന്‍ തല്ലിയോടിച്ചതെന്നാണ് അജിന്റെ മൊഴി.
അജിന്റെ മൊഴിയുടെ അടിസ്ഥാനത്തില്‍ പെണ്‍കുട്ടിയുടെ വീട്ടില്‍ പോലീസ് പരിശോധന നടത്തി. ഉപയോഗിച്ചതും അല്ലാത്തതുമായ ഗര്‍ഭ നിരോധന ഉറകളും കഞ്ചാവും ഇവിടെ നിന്ന് കണ്ടെടുത്തു. കൂടുതല്‍ പെണ്‍കുട്ടികള്‍ ഈ ലഹരി സംഘത്തിന്റെ കെണിയില്‍ പെട്ടിട്ടുണ്ടാകാമെന്നാണ് വിവരം. ഇതിന്റെ അടിസ്ഥാനത്തില്‍ പോലീസ് അന്വേഷണം ഊര്‍ജ്ജിതമാക്കി.
