ഏറ്റുമാനൂര്‍ : ഇടവേളക്കുശേഷം ലഹരിസംഘങ്ങളുടെ താവളമായി ഏറ്റുമാനൂര്‍ മാറുന്നു. ഇവര്‍ തമ്മില്‍ സംഘര്‍ഷങ്ങളും പതിവാണ്. മഹാദേവക്ഷേത്രം ദേവസ്വം കംഫര്‍ട്ട് സ്റ്റേഷനു സമീപം സംഘട്ടനത്തില്‍ കുത്തേറ്റ വയോധികന്‍ മരിച്ച സംഭവത്തിലും മദ്യമാണ് വില്ലന്‍.
കഴിഞ്ഞ ചൊവ്വാഴ്ചയുണ്ടായ സംഘട്ടനത്തില്‍ കുത്തേറ്റ കുമ്മനം സ്വദേശി ഹരീന്ദ്രന്‍ (ഹരി 65) കഴിഞ്ഞ ദിവസമാണ് മരിച്ചത്. ഇയാളെ കൊലപ്പെടുത്തിയ കേസില്‍ ഇടുക്കി പന്നിമറ്റം വെള്ളിയാമറ്റം ഇളംദേശം കാഞ്ഞിരംകുഴിയില്‍ കെ.എസ്. ഗിരീഷിനെ (40) പൊലീസ് അറസ്റ്റ് ചെയ്തു. ക്ഷേത്രമുറ്റത്ത് അലഞ്ഞുതിരിഞ്ഞ് നടന്നിരുന്ന ഹരിയും ഗിരീഷും മദ്യപാനത്തെതുടര്‍ന്നുണ്ടായ വാക്കേറ്റമാണ് കത്തിക്കുത്തില്‍ കലാശിച്ചത്.
വയറ്റില്‍ കുത്തേറ്റ ഹരിയെ ഏറ്റുമാനൂര്‍ എസ്.ഐ ടി.എ റെനീഷിന്‍റെ നേതൃത്വത്തില്‍ കോട്ടയം മെഡിക്കല്‍ കോളജ് ആശുപത്രിയില്‍ എത്തിക്കുകയായിരുന്നു. ശനിയാഴ്ച രാവിലെയോടെയായിരുന്നു ഹരി മരിച്ചത്. ആശാരിപ്പണിക്കാരനായ ഗിരീഷ് വര്‍ഷങ്ങളായി വീടുവിട്ട് നടക്കുകയായിരുന്നു. കുമ്മനം സ്വദേശി ആണെങ്കിലും ഏറ്റുമാനൂര്‍ ക്ഷേത്രപരിസരം കേന്ദ്രീകരിച്ചാണ് ഹരി ജീവിച്ചിരുന്നത്.
