പുനലൂര് : മദ്യലഹരിയില് യുവാവ് തീവണ്ടിപ്പാളത്തില്. ഇതേ തുടര്ന്ന് ചൈന്നൈ-എഗ്മോര് എക്സ്പ്രസ് ഏഴുമിനിറ്റ് പിടിച്ചിട്ടു. പുനലൂരില് കല്ലടപ്പാലത്തിന് സമീപം ഇന്നലെ ഉച്ചയ്ക്ക് ഒന്നിനായിരുന്നു സംഭവം. കരവാളൂര് നരിക്കല് സ്വദേശി ഹരിലാലാ(30)ണ് ട്രെയിന് യാത്ര തടസ്സപ്പെടുത്തിയത്. ചെന്നൈക്ക് പോകുകയായിരുന്ന തീവണ്ടി പുനലൂര് സ്റ്റേഷന് വിട്ട ഉടനായിരുന്നു സംഭവം.
വേഗം വളരെ കുറവായിരുന്നതിനാല് ദൂരെ നിന്നു തന്നെ പാളത്തില് നിന്ന യുവാവിനെ ലോക്കോ പൈലറ്റിന്റെ ശ്രദ്ധയില്പ്പെട്ടു. ഉടന് തീവണ്ടി നിര്ത്തുകയും ചെയ്തു. തീവണ്ടിയിലുണ്ടായിരുന്ന റെയില്വേ സംരക്ഷണസേനാ (ആര്.പി.എഫ്.) ഉദ്യോഗസ്ഥര് യുവാവിനെ കസ്റ്റഡിയിലെടുത്തു. തുടര്ന്നാണ് വണ്ടി പുറപ്പെട്ടത്. സ്റ്റേഷനിലെത്തിച്ച യുവാവിനെ വൈദ്യപരിശോധനയ്ക്കു വിധേയനാക്കി കേസെടുത്ത് ജാമ്യത്തില് വിട്ടു.
