വടക്കടത്തുകാവ് : ശബരിമല തീർഥാടകരുടെ വാഹനയാത്ര സുരക്ഷിതമാക്കുന്നതിനായി ഡി.വൈ.എഫ്.ഐ.യുടെ നേതൃത്വത്തിൽ ചുക്കുകാപ്പി വിതരണം ആരംഭിച്ചു. ‘ഉറങ്ങിപ്പോകേണ്ട’ ഡി.വൈ.എഫ്.ഐ. ജാഗ്രതാ കേന്ദ്രങ്ങൾ എന്ന പേരിൽ ആരംഭിച്ച പദ്ധതി എം.സി. റോഡിൽ വടക്കടത്തുകാവിൽ തുടക്കമായി. രാത്രി 11 മുതൽ പുലർച്ചെവരെ വാഹനങ്ങളിലെ ഡ്രൈവർമാർക്കാണ് ചുക്കുകാപ്പി വിതരണം ചെയ്യുന്നത്.
ദീർഘദൂരം ഓടി വരുന്ന വാഹനങ്ങളിലെ ഡ്രൈവർമാർക്ക് വിശ്രമിക്കാനുള്ള സൗകര്യവും ജാഗ്രതാ കേന്ദ്രത്തിൽ ഒരുക്കിയിട്ടുണ്ടെന്ന് ഡി.വൈ.എഫ്.ഐ. അടൂർ ബ്ലോക്ക് സെക്രട്ടറി മുഹമ്മദ് അനസ് പറഞ്ഞു. ജാഗ്രതാ കേന്ദ്രത്തിന്റെ ഉദ്ഘാടനം അടൂർ എസ്.ഐ. എസ്.വിപിൻകുമാർ നിർവഹിച്ചു.
ഡി.വൈ.എഫ്.ഐ. ബ്ലോക്ക് പ്രസിഡന്റ് വിഷ്ണു ഗോപാൽ അധ്യക്ഷനായി. ബ്ലോക്ക് സെക്രട്ടറി മുഹമ്മദ് അനസ്, ജില്ലാ കമ്മിറ്റി അംഗം വി.വിനേഷ്, കിരൺ കൃഷ്ണൻ, സതീഷ് ബാലൻ, എം.ജി.സച്ചിൻ, സി.പി.എം. ഏറത്ത് ലോക്കൽ കമ്മിറ്റി സെക്രട്ടറി കെ.മോഹനൻ എന്നിവർ പ്രസംഗിച്ചു.
