കൊച്ചി : ഇ ബുള്ജെറ്റ് വ്ളോഗര്മാര്ക്കെതിരായ കേസില് ഉത്തരവുമായി കോടതി. വാഹനത്തിലെ മുഴുവന് അനധികൃത ഫിറ്റിംഗുകളും നീക്കം ചെയ്യണമെന്ന് കോടതി ഉത്തരവിട്ടു. ചട്ടവിരുദ്ധമായുള്ള ഫിറ്റിംഗുകള് എം.വി.ഡി ഉദ്യോഗസ്ഥരുടെ സാന്നിധ്യത്തില് നീക്കണം. വാഹനം നിയമാനുസൃതമായ രീതിയില് തിരികെ സ്റ്റേഷനില് ഏല്പ്പിക്കാനും കോടതി ഉത്തരവിട്ടു. നിലവില് മോട്ടോര് വാഹന വകുപ്പിന്റെ കീഴിലാണ് വാഹനം സൂക്ഷിച്ചിരിക്കുന്നത്. കോടതിയില് അപ്പീല് പോകുമെന്ന് ഇ ബുള് ജെറ്റ് വ്ളോഗര്മാര് വ്യക്തമാക്കി. വാഹനം രൂപമാറ്റം വരുത്തിയതും നികുതി അടക്കാത്തതും അടക്കമുള്ള നിയമലംഘനങ്ങളെ തുടര്ന്നാണ് കണ്ണൂര് മോട്ടോര് വാഹന വകുപ്പ് എന്ഫോഴ്സ്മെന്റ് വിഭാഗം ഇവരുടെ വാന് പിടിച്ചെടുത്തത്.
ഇ ബുള്ജെറ്റ് വ്ളോഗര്മാര്ക്കെതിരെയും അവരുടെ നെപ്പോളിയന് എന്ന കാരവനെതിരെയും കൂടുതല് നടപടി ഉണ്ടാകുമെന്ന് മോട്ടോര് വാഹന വകുപ്പ് നേരത്തെ സൂചിപ്പിച്ചിരുന്നു. അതിന് പിന്നാലെ വാഹനത്തിന്റെ രജിസ്ട്രേഷന് റദ്ദാക്കിയിരുന്നു. ഒമ്പതോളം നിയമലംഘനങ്ങള് കാരവനില് കണ്ടെത്തിയതായി മോട്ടോര് വാഹനവകുപ്പ് വ്യക്തമാക്കിയിരുന്നു. വെള്ള നിറത്തിലായിരുന്ന വാനിന്റെ നിറം മാറ്റിയതും അനുവദനീയമല്ലാത്ത ലൈറ്റുകള് ഘടിപ്പിച്ചതും വാഹനം രൂപമാറ്റം വരുത്തിയതുമടക്കമുള്ള നിയമലംഘനങ്ങളാണ് വ്ലോഗര്മാര് നടത്തിയിരിക്കുന്നത്.
