പത്തനംതിട്ട : ഇലവുംതിട്ട ജനമൈത്രി പോലീസ് നടപ്പിലാക്കിവരുന്ന അശരണർക്ക് കൈത്താങ്ങാകുന്ന ‘സ്നേഹപൂർവ്വം” പദ്ധതിയുടെ ഏപ്രിൽ മാസത്തെ സഹായം വിതരണം ചെയ്തു. സ്റ്റേഷൻ പരിധിയിലെ സാമ്പത്തികമായി പിന്നാക്കം നില്ക്കുന്ന കിടപ്പു രോഗികൾക്ക് ഭക്ഷ്യധാന്യങ്ങൾ എല്ലാ മാസവും വീട്ടിൽ നേരിട്ടെത്തിക്കുന്ന പദ്ധതിയാണിത്.
എസ്എച്ച് ഒ ടി കെ വിനോദ് കൃഷണന്റെ മേൽനോട്ടത്തിൽ ജനമൈത്രി ബീറ്റ് ഓഫീസർമാരായ എസ് അൻവർഷ, ആർ പ്രശാന്ത് എന്നിവർ നേതൃത്വം നല്കുന്ന ഹൗസ് ക്യാമ്പയിനിലൂടെയാണ് അർഹരായവരെ തെരഞ്ഞെടുക്കുന്നത്. സ്റ്റേഷനിലെ പോലീസുദ്യോഗസ്ഥരുടെ ശമ്പള വിഹിതത്തിലൂടെയാണ് പദ്ധതി നടപ്പിലാക്കി വരുന്നത്. കോവിഡ് ദുരിതത്തിലും മുടങ്ങാതെ ഭക്ഷ്യധാന്യങ്ങൾ പോലീസ് വീട്ടിലെത്തിക്കുന്നത് നിറഞ്ഞ മനസോടെ സ്വീകരിക്കുന്നതായി പദ്ധതിയുടെ ഗുണഭോക്താക്കൾ പറഞ്ഞു. തീർത്തും അർഹരായവർക്ക് മുടങ്ങാതെ ഭക്ഷ്യധാന്യങ്ങൾ എത്തിച്ച് കൊടുക്കുന്നതറിഞ്ഞ സുമനസുകൾ സഹായവുമായി മുന്നോട്ട് വരുന്നുണ്ട്. അവരുടെ സഹകരണത്തോടെ കോവിഡ്- 19 ദുരിതബാധിതരായ നിരവധിയാൾക്കാർക്കുളള ഭക്ഷ്യധാന്യങ്ങൾ ഇലവുംതിട്ട ജനമൈത്രി പോലീസ് എത്തിച്ച് നല്കിയിട്ടുണ്ട്.
