ഇലവുംതിട്ട : വീട്ടിലെ പഴയ ടിവി തകരാറിലായിട്ട് മാസങ്ങളായി. സ്കൂളിലെ ഓൺലൈൻ പഠനവും ആരംഭിച്ചു. മൂന്നാം ക്ലാസുകാരൻ ഇലവുംതിട്ട മണ്ണിൽ മുകടിയിൽ ആരോൺ പഠനം മുടങ്ങിയ വിഷമത്തിലും. ആരോണും അനുജത്തി അക്സയും മാതാപിതാക്കളും വാടകവീട്ടിലാണ് താമസം. സാമ്പത്തികമായി ബുദ്ധിമുട്ടിലായ ഇവരുടെ അവസ്ഥ ജനമൈത്രി പോലീസിനെ വാര്ഡ് മെമ്പറാണ് അറിയിക്കുന്നത്.
തുടര്ന്ന് പോലീസിന്റെ നേതൃത്വത്തിൽ ആരോണിന് പുതിയ ടെലിവിഷൻ മുന് എം.എല്.എ കെ.സി രാജഗോപാലനും എസ്എച്ച്ഒ എം രാജേഷും ചേർന്ന് നല്കി. സ്പോൺസറായ കെ ജി മാത്യു, വാർഡംഗം സിബി നൈനാൻ കോശി, എഎസ്ഐ രാജശേഖരൻ നായർ,കേരള പോലീസ് അസോസിയേഷൻ ജില്ലാ ജോയിന്റ് സെക്രട്ടറി കെഎസ് സജു, ജനമൈത്രി ബീറ്റ് ഓഫീസർമാരായ എസ് അൻവർഷ, ആർ പ്രശാന്ത്, എസ് ശ്രീജിത്, താജുദീൻ, ജനമൈത്രി പോലീസ് വളണ്ടിയർമാർ എന്നിവർ നേതൃത്വം നല്കി.
