കോന്നി : പുനലൂർ മൂവാറ്റുപുഴ നിർമ്മാണവുമായി ബന്ധപ്പെട്ട് നടക്കുന്ന ഓടകളുടെ നിർമ്മാണ പ്രവർത്തങ്ങൾ ജനങ്ങൾക്ക് ഭീഷണിയായി മാറുന്നു. കഴിഞ്ഞ ദിവസമാണ് നിർമ്മാണ പ്രവർത്തനം നടക്കുന്ന സ്ലാബ് സ്ഥാപിക്കാത്ത ഓടയിൽ വീണ് വൃദ്ധന് ഗുരുതര പരിക്കേറ്റത്. കോന്നി മാങ്ങാരം തെങ്ങും മൂട്ടിൽ പീടികയിൽ ടി കെ ബഷീർ(73)നാണ് ഗുരുതര പരുക്ക് പറ്റിയത്. റോഡ് നിർമ്മാണത്തിനായി എടുത്തിരിക്കുന്ന കുഴികൾ വലിയ അപകടങ്ങൾ ആണ് കോന്നിയിൽ വരുത്തി വെക്കുന്നത്. നിർമ്മാണം ഏറ്റെടുത്തിരിക്കുന്ന കരാർ കമ്പനിയും ഇതിൽ ശ്രദ്ധിക്കുന്നില്ല.
നഗരത്തിൽ അടക്കം പല ഭാഗത്ത് ഓടകൾക്കും കലുങ്ങുകൾക്കും കുഴികൾ നിർമ്മിച്ച് കഴിഞ്ഞാൽ ഇത് മാസങ്ങളോളം മൂടാതെ ഇട്ടിരിക്കുന്ന അവസ്ഥയിലാണ്. ഇത് മൂലം വ്യാപാര സ്ഥാപനങ്ങളിലേക്ക് കയറുവാൻ പോലും ജനങ്ങൾക്ക് സാധിക്കുന്നില്ല. കോന്നി സെൻട്രൽ ജംഗ്ഷനിൽ കലുങ്ക് നിർമ്മാണം വേഗത്തിൽ പൂർത്തീകരിക്കാത്തത് മൂലം പോസ്റ്റോഫീസ് റോഡിലേക്ക് ബസുകൾ അടക്കം തിരിഞ്ഞ് കയറാൻ സാധിക്കാത്ത അവസ്ഥയിലാണ്. റോഡ് നിർമ്മാണത്തിന്റെ ഭാഗമായി എടുത്ത കുഴികൾ മൂടാത്തത്തിൽ കരാർ കമ്പനിക്കെതിരെ നാട്ടുകാരുടെ പ്രതിഷേധം ശക്തമാവുകയാണ്.