പന്തീരാങ്കാവ് : മരിച്ചു പോയ വൃദ്ധയുടെ പെന്ഷന് തട്ടിയെടുത്തു, സഹകരണബാങ്കിലെ ഉദ്യോഗസ്ഥനെ ജോലിയില് നിന്ന് മാറ്റി നിര്ത്തി. മരിച്ചയാളുടെ പേരില് ഒമ്പത് മാസത്തോളം ബാങ്ക് കലക്ഷന് ഏജന്റ് ക്ഷേമ പെന്ഷന് തട്ടിയെടുത്തതായി പരാതി. വിവാദമായതിനെത്തുടര്ന്ന് നടത്തിയ അന്വേഷണത്തില് വാര്ധക്യ പെന്ഷന് വാങ്ങുന്നവരുള്പ്പെടെ പലരുടെയും പണം ലഭിക്കുന്നില്ലെന്ന പരാതി ഉയര്ന്നു. പെരുമണ്ണ ഗ്രാമപഞ്ചായത്തില്നിന്ന് വിധവ പെന്ഷന് ലഭിച്ചിരുന്ന പാറോല് സരോജിനിയുടെ പേരിലുള്ള പെന്ഷനാണ് ഒമ്പതു മാസത്തോളം കലക്ഷന് ഏജന്റ് തട്ടിയെടുത്തത്. 2020 ഒക്ടോബറില് സരോജിനി മരിച്ചിരുന്നു. ഒരു മാസത്തിനുള്ളില് ബന്ധുക്കള് ഗ്രാമ പഞ്ചായത്തില്നിന്ന് മരണ സര്ട്ടിഫിക്കറ്റിന് അപേക്ഷ നല്കി വാങ്ങുകയും ചെയ്തു. സരോജിനിയുടെ മരണശേഷം വീട്ടിലേക്കുള്ള പെന്ഷന് നിലച്ചിരുന്നു. ആഴ്ചകള്ക്ക് മുന്പ് ഗ്രാമപഞ്ചായത്ത് അധികൃതര് സരോജിനിയുടെ ബന്ധുക്കളെ വിളിച്ച് അനധികൃതമായി കൈപ്പറ്റിയ തുക തിരികെ അടക്കണമെന്ന് ആവശ്യപ്പെട്ടപ്പോഴാണ് അമ്മയുടെ മരണശേഷവും പെന്ഷന് വിതരണം ചെയ്തിട്ടുണ്ടെന്ന വിവരം മക്കള് അറിയുന്നത്.
പെന്ഷന് തങ്ങള് വാങ്ങുന്നില്ലെന്ന ബന്ധുക്കളുടെ മറുപടിയെ തുടര്ന്നാണ് ഒമ്പത് മാസമായി പെരുമണ്ണ സര്വിസ് സഹകരണ ബാങ്ക് വഴി വിതരണം ചെയ്ത പണം കലക്ഷന് ഏജന്റ് തട്ടിയതായി ബോധ്യമായത്. വര്ഷങ്ങളായി കിട്ടിക്കൊണ്ടിരിക്കുന്ന വാര്ധക്യ പെന്ഷന് മുടങ്ങിയതായി നിര്ധനരായ മറ്റ് ചിലരും പരാതിയുമായി ഗ്രാമ പഞ്ചായത്തിനെ സമീപിച്ചിട്ടുണ്ട്. വിവാദമായതോടെ ഏജന്റ് കൈപ്പറ്റിയ തുക തിരികെ അടച്ച് തലയൂരാന് ശ്രമം നടത്തിയിരുന്നു. ഗ്രാമപഞ്ചായത്ത് നല്കിയ കാരണം കാണിക്കല് നോട്ടീസിനെ തുടര്ന്ന് ബാങ്ക് അധികൃതര് കലക്ഷന് ഏജന്റ് കോട്ടായി ഗോപാലകൃഷ്ണനെ സേവനത്തില്നിന്ന് മാറ്റി നിര്ത്തിയിട്ടുണ്ട്. സംഭവം അന്വേഷിക്കാന് കമ്മിറ്റിയെ നിയോഗിച്ചതായും തുടര്നടപടികള് കൈക്കൊള്ളുമെന്നും പെരുമണ്ണ സര്വിസ് സഹകരണ ബാങ്കുമായി ബന്ധപ്പെട്ടവര് അറിയിച്ചു.
