റാന്നി: പുസ്തകങ്ങളിലൂടെ അറിവു നേടുവാന്‍ ഇന്നത്തെ തലമുറ തയ്യാറാകുന്നില്ലെന്ന് താലൂക്ക് ലൈബ്രറി കൗണ്‍സില്‍ പ്രസിഡന്‍റ്എം.വി വിദ്യാധരന്‍ പറഞ്ഞു. താലൂക്ക് ലൈബ്രറി കൗണ്‍സില്‍ നേതൃത്വത്തില്‍ റാന്നിയില്‍ നടത്തിയ മുതിര്‍ന്നവര്‍ക്കുള്ള വായനാമത്സരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പഴയ തലമുറ അറിവുകള്‍ നേടുന്നതിനായി സമയം ചിലവഴിച്ചതു നാട്ടിലെ ലൈബ്രറികള്‍ വഴിയാണ്. പുതുതലമുറ ഇത് പാടെ അവഗണിക്കുകയാണ്.നാടിനേയും സമൂഹത്തേയും അറിഞ്ഞ് പുതുതലമുറയെ വളര്‍ത്തിയെടുക്കാന്‍ സംസ്ഥാന ലൈബ്രറി കൗണ്‍സില്‍ വിവിധ പദ്ധതികള്‍ ആവിഷ്കരിച്ചിട്ടുണ്ടെന്നും അദേഹം ചൂണ്ടികാട്ടി. പി. ചന്ദ്രമോഹന്‍ അധ്യക്ഷത വഹിച്ചു.
കൃഷ്ണകുറപ്പ്,ലീലാ ഗംഗാധരന്‍, പി.കെ പ്രഭാകരന്‍,പി.ആര്‍ ജനാര്‍ദ്ധനന്‍,തോമസ് മാമ്മന്‍ എന്നിവര്‍ പ്രസംഗിച്ചു.”അക്ഷരമാണ് ലഹരി,ജീവിതമാണ് ലഹരി” എന്ന വിഷയത്തില്‍ എക്സൈസ് പ്രിവന്‍റീവ് ഓഫീസര്‍ ബിജു ഫിലിപ്പും വൈദ്യുതി സ്വകാര്യ വത്ക്കരണത്തെപ്പറ്റി ടി.ജെ ബാബുരാജും ക്ലാസുകള്‍ നയിച്ചു.തലച്ചോറിലെ ഗ്രന്ഥികളെ ഉണര്‍ത്താനും ഉത്തേജിപ്പിക്കാനും വായന കൊണ്ടുകഴിയുമെന്നും കുട്ടികളുടെ ലഹരി വായനയാക്കി മാറ്റാന്‍ രക്ഷിതാക്കള്‍ ശ്രമിക്കണമെന്നും അദേഹം പറഞ്ഞു.
