തിരുവനന്തപുരം : വിതുരയില്‍ കാട്ടു പന്നിക്കായി ഒരുക്കിയ കമ്പിവേലിയില്‍ നിന്ന് ഷോക്കേറ്റ് മധ്യവയസ്കന്‍ മരിച്ചു. ആളെ തിരിച്ചറിഞ്ഞിട്ടില്ല. ലക്ഷ്മി എസ്റ്റേറ്റിന് സമീപത്ത് നിന്നാണ് മൃതദേഹം കണ്ടെത്തിയത്. ഇന്ന് രാവിലെ ഒമ്പത് മണിയോടെയിരുന്നു സംഭവം. വീടിനോട് ചേര്‍ന്ന് കാട്ടുപന്നിയെ കൊല്ലാന്‍ വേണ്ടി കെട്ടിയ വൈദ്യുതി കമ്പിവേലിയില്‍ നിന്ന് ഷോക്കേറ്റതായിരിക്കാം എന്നാണ് പ്രാഥമിക നിഗമനം.
അറുപത് വയസ് തോന്നിക്കുന്ന ആളുടെ മൃതദേഹം നഗ്നമായ രീതിയിലായിരുന്നു കണ്ടെത്തിയത്. സമീപവാസികളോട് ഇയാളെക്കുറിച്ച്‌ അന്വേഷിച്ചെങ്കിലും തിരിച്ചറിയാന്‍ സാധിച്ചിട്ടില്ല എന്നാണ് പോലീസ് പറയുന്നത്. കാലിന് താഴെയായി പൊള്ളലേറ്റ പാട് കണ്ടെത്തിയിട്ടുണ്ട്. മൃതദേഹം തിരുവനന്തപുരം മെഡിക്കല്‍ കോളേജ് മോര്‍ച്ചറിയിലേക്ക് മാറ്റി.
