ഗൂഡല്ലൂര് : ഓവേലിയില് വീട്ടമ്മയെ കാട്ടാന ചവിട്ടിക്കൊന്നു. ഓവേലി വാരത്തെ മുംതാസ് (40) രാത്രി ഒമ്പതുമണിയോടെ കാട്ടാനയുടെ ആക്രമണത്തില് കൊല്ലപ്പെട്ടത്. ഒപ്പമുണ്ടായിരുന്ന ഇവരുടെ ഭര്ത്താവ് കുഞ്ഞാലിക്കും പരിക്കേറ്റു. മഞ്ചേശ്വരി തേയില പ്ലാന്റേഷനില് ഉള്പ്പെട്ട വാരം തേയില എസ്റ്റേറ്റിലെ തൊഴിലാളിയാണ് മുംതാസ്. ഭര്ത്താവ് കുഞ്ഞാലിയും ഇവിടെ തൊഴിലാളിയാണ്. കാടിനോട് ചേര്ന്ന കുന്നിന്മുകളിലാണ് ഇവരുടെ വീട്. വെള്ളിയാഴ്ച രാത്രി ഇരുവരും അയല്പ്പക്കത്തുനിന്ന് തിരികെ വീട്ടിലേക്ക് മടങ്ങുന്നതിനിടെയാണ് സംഭവം. വീടിന് സമീപത്തെ ചെങ്കുത്തായ കയറ്റത്തില്നിന്ന് പെട്ടെന്നിറങ്ങിവന്ന കാട്ടാന ഇവരെ ആക്രമിച്ചെന്നാണ് കരുതുന്നത്.
കാട്ടാനയുടെ ചവിട്ടേറ്റ് മുംതാസിന്റെ മുഖം തകര്ന്നിരുന്നു. ഗൂഡല്ലൂര്-ഓവേലി മെയിന്റോഡില്നിന്ന് 200 മീറ്റര് മാറിയാണ് സംഭവം നടന്നത്. കൂട്ടക്കരച്ചില് കേട്ട് നാട്ടുകാര് ടോര്ച്ചും പന്തവുമായി ഓടിയെത്തുമ്പോഴേക്കും കാട്ടാന കാട്ടിലേക്ക് ഓടിമറഞ്ഞെന്ന് സമീപവാസികള് പറഞ്ഞു. ബുധനാഴ്ച ഇവിടെനിന്ന് എട്ടുകിലോമീറ്റര് അകലെ ആറാട്ടുപാറയിലെ ഗോവിന്ദന് കടയ്ക്ക് സമീപം വെച്ചാണ് ചായക്കട നടത്തുകയായിരുന്ന ആനന്ദരാജ് കാട്ടാനയുടെ ചവിട്ടേറ്റ് കൊല്ലപ്പെട്ടത്. ഒരാഴ്ചയ്ക്കിടെ രണ്ടാമത്തെ സംഭവമാണ് ഓവേലിമേഖലയില് ഉണ്ടാകുന്നത്.
