ഡല്ഹി: രാജ്യത്ത് കോവിഡ് കേസുകള് വര്ധിക്കുന്ന സാഹചര്യത്തില് ജനങ്ങള് ആവശ്യമായ മുന്കരുതലുകളെടുക്കണമെന്ന് പ്രധാനമന്ത്രി നരേന്ദ്ര മോദി. ജനങ്ങള് കോവിഡ് മാനദണ്ഡം പാലിക്കണമെന്നും അദ്ദേഹം ഓര്മിപ്പിച്ചു. ബുധനാഴ്ച ചേര്ന്ന ഉന്നത ഉദ്യോഗസ്ഥരുടെ യോഗത്തിലാണ് പ്രധാനമന്ത്രി ഇക്കാര്യങ്ങള് നിര്ദേശിച്ചത്. കഴിഞ്ഞ 24 മണിക്കൂറിനിടെ 1134 പേര്ക്കാണ് രാജ്യത്ത് കോവിഡ് സ്ഥിരീകരിച്ചത്. അഞ്ചുപേര്കൂടി മരിച്ചു. കോവിഡ് കേസുകള് ക്രമാതീതമായി ഉയരുകയാണെന്നും പരിശോധന, ചികിത്സ, നിരീക്ഷണം, വാക്സിനേഷന് എന്നിവ കര്ശനമാക്കാനും കേന്ദ്ര ആരോഗ്യമന്ത്രാലയം നിര്ദേശം നല്കിയിട്ടുണ്ട്.
അതേസമയം കേരളത്തിലും കോവിഡ് കേസുകളില് നേരിയ വര്ധനവിനെ തുടര്ന്ന് ജാഗ്രതാ നിര്ദേശം നല്കിയിട്ടുണ്ട്. മതിയായ ഒരുക്കങ്ങള് നടത്താന് ജില്ലകള്ക്ക് നിര്ദേശം നല്കി. ആവശ്യമായ സജ്ജീകരണങ്ങള് ഒരുക്കാന് ആശുപത്രികള്ക്കും ആരോഗ്യവകുപ്പ് നിര്ദേശം നല്കിയിട്ടുണ്ട്. പ്രായമായവരും കുട്ടികളും ഗര്ഭിണികളും മാസ്ക് ധരിക്കണം. നിരീക്ഷണം ശക്തമാക്കണമെന്നും മന്ത്രി വീണാ ജോര്ജ് ആവശ്യപ്പെട്ടു. രോഗികളുടെ എണ്ണം ഉയര്ന്നാല് ഐസിയു വെന്റിലേറ്ററുകള് കോവിഡ് ബാധിതര്ക്കായി മാറ്റിവെക്കണമെന്നും നിര്ദേശിച്ചിട്ടുണ്ട്.
