പത്തനംതിട്ട : ദേശീയ പുരസ്കാര ജേതാവ് നഞ്ചിയമ്മ നയിച്ച കനല് ബാന്ഡിന്റെ നാടന്പാട്ട് വിസ്മയത്തില് ആവേശം കൊണ്ട് കോന്നി നവകേരളസദസ്സ്. കെഎസ്ആര്ടിസി മൈതാനത്ത് നടന്ന കോന്നി നിയോജക മണ്ഡലം നവകേരള സദസിന്റെ വേദിയില് മുഖ്യമന്ത്രിയും മറ്റ് മന്ത്രിമാരും എത്തുന്നതിന് മുന്നോടിയായാണ് ഗാനമേള സംഘടിപ്പിച്ചത്. പ്രമാടം ഗ്രാമപഞ്ചായത്ത് പ്രസിഡന്റ് എന്. നവനീതും വേദിയില് കലാകാരന്മാര്ക്കൊപ്പം നിറഞ്ഞ് നിന്നു. നവനീതിന്റെ ‘ആടിവാ മയില് ആടിവാ’ എന്ന നാടന്പാട്ടിനൊപ്പം ഗായകരും കാണികളും താളമിട്ടു.
അന്തരിച്ച പ്രശസ്ത ഗായകന് ബാനര്ജിക്ക് ആദരസൂചകമായി അദ്ദേഹത്തിന്റെ ഗാനങ്ങളും വേദിയില് ആലപിച്ചു. സംസ്ഥാന സര്ക്കാരിന്റെ വികസനക്ഷേമ പദ്ധതികള് വിശദീകരിക്കാനും ജനങ്ങളുടെ പ്രശ്നങ്ങള് ചോദിച്ചറിയാനും മുഖ്യമന്ത്രി പിണറായി വിജയനും 20 മന്ത്രിമാരും ജനങ്ങള്ക്കു മുന്നിലെത്തുന്ന നവകേരളസദസ് കോന്നി മണ്ഡലത്തില് ആരംഭിക്കുന്നതിന് മുന്പ് വേദിയില് നടന്ന കലാപരിപാടികള് സദസ്സിനു ആവേശമായി. കനല് ബാന്ഡിന്റെ ഓരോ നാടന് പാട്ടിനുമൊപ്പം സദസ്യര് താളം പിടിച്ചും ചുവട് വെച്ചും ഒപ്പം ചേര്ന്നപ്പോള് കോന്നി മണ്ഡലത്തില് ഉത്സവപ്രതീതി നിറഞ്ഞു. ഗാനമേള കൂടാതെ നൃത്ത പരിപാടികളും വേദിയില് അരങ്ങേറി.
