കൊച്ചി : കോവിഡ് കേസുകള്‍ ഉയരുന്ന പശ്ചാത്തലത്തില്‍ എറണാകുളത്ത് നിയന്ത്രണങ്ങള്‍ കടുപ്പിക്കുന്നു. മുനമ്പം, ചെറായി, പള്ളത്താം കുളങ്ങര ബീച്ചുകള്‍ അടച്ചു. ഇനിയൊരു അറിയിപ്പുണ്ടാവും വരെ ബീച്ചുകളിലേക്ക് സഞ്ചാരികള്‍ക്ക് പ്രവേശനമുണ്ടാകില്ല.
കൊവിഡ് പശ്ചാത്തലത്തില്‍ എറണാകുളം ജില്ലയില്‍ കര്‍ശന നിയന്ത്രണങ്ങളാണ് അധികൃതര്‍ ഏര്‍പ്പെടുത്തിയിരിക്കുന്നത്. എറണാകുളം റൂറല്‍ ജില്ലയിലെ അഞ്ച് സബ് ഡിവിഷനുകളിലും പ്രത്യേക സ്‌ക്വാഡ് രൂപീകരിച്ചു. മാര്‍ക്കറ്റുകളില്‍ ആള്‍ക്കാര്‍ കൂട്ടം കൂടരുതെന്ന് ആലുവ റൂറല്‍ എസ്. പി നിര്‍ദേശം നല്‍കി.
കൂടാതെ മൊത്ത വ്യാപാരവും ചില്ലറ വ്യാപാരവും ഒറ്റ സമയത്ത് നടത്തുന്നതിന് അനുമതിയില്ല. കടകളില്‍ പൊതുജനത്തിന് നില്‍ക്കേണ്ട സ്ഥലങ്ങള്‍ കൃത്യമായി അടയാളപ്പെടുത്തണമെന്നും നിര്‍ദേശമുണ്ട്. ഉപഭോക്താക്കള്‍ മാര്‍ക്കറ്റില്‍ വരുന്ന സമയത്തിന് കൃത്യത വരുത്തണം. കൊവിഡ് മാനദണ്ഡങ്ങള്‍ ലംഘിക്കുന്നവര്‍ക്കെതിരെ എപ്പിഡമിക് ഡിസീസസ് ഓര്‍ഡിനന്‍സ് പ്രകാരം കേസെടുക്കാനും നിര്‍ദേശമുണ്ട് .
