കോന്നി : വരൾച്ച രൂക്ഷമായ സാഹചര്യത്തിൽ കോന്നിയിൽ അടിക്കടി കുടിവെള്ള പൈപ്പ് ലൈനുകൾ പൊട്ടുമ്പോഴും പുനഃസ്ഥാപിക്കാൻ നടപടിയില്ല. ഏഴു ദിവസത്തിലേറെയായി കോന്നി നഗരത്തിൽ കുടിവെള്ള പൈപ്പ് ലൈൻ പൊട്ടി കുടിവെള്ളം റോഡിലൂടെ ഒഴുകാൻ തുടങ്ങിയിട്ട്. കോന്നി ടാക്സി സ്റ്റാൻഡിന് സമീപത്തായാണ് പൈപ്പ് പൊട്ടിയത്. നിരവധി തവണ ജല അതോറിറ്റിയെ വിവരം ധരിപ്പിച്ചിട്ടും യാതൊരു നടപടിയും ഉണ്ടാകുന്നില്ല എന്നാണ് ജനങ്ങളുടെ ആക്ഷേപം. കോന്നി എലിയറക്കൽ ഭാഗത്തും കഴിഞ്ഞ ദിവസം പൈപ്പ് ലൈൻ പൊട്ടി കുടിവെള്ളം റോഡിൽ പാഴായിരുന്നു.
കോന്നി നഗരത്തിൽ കൂടുതലും വീട്ടുകാർ വാട്ടർ അതോറിറ്റി പൈപ്പ് ലൈനുകളെ ആണ് കുടിവെള്ളത്തിനായി കൂടുതലായും ആശ്രയിക്കുന്നത്. ഇതിനാൽ തന്നെ പ്രധാന പൈപ്പ് ലൈനുകൾ പൊട്ടുമ്പോൾ നിരവധി വീടുകളിൽ കുടിവെള്ളം ലഭ്യമാകാതെ പോകുന്നുണ്ട്. ഗാർഹിക കണക്ഷനുകൾ വർധിക്കുമ്പോൾ ഇതിന് അനുസൃതമായി വ്യാസം കുറഞ്ഞ പൈപ്പുകൾ മാറ്റി സ്ഥാപിക്കാത്തത് പൈപ്പ് ലൈൻ അടിക്കടി പൊട്ടുന്നതിന് കാരണമായി തീരുന്നുണ്ട്. പല സ്ഥലങ്ങളിലും പൈപ്പ് പൊട്ടിയതിന് ശേഷം ദിവസങ്ങൾ കഴിഞ്ഞാണ് ഇത് പലപ്പോഴും പുനഃസ്ഥാപിക്കുക. ഇതിനിടയിൽ കുടിവെള്ളം പമ്പുചെയ്യുമ്പോൾ കുടിവെള്ളം നടുറോഡിൽ പാഴായി പോവുകയാണ്. വിഷയത്തിൽ അടിയന്തിര നടപടി സ്വീകരിക്കണം എന്നും ആവശ്യമുയരുന്നു.
