തിരുവനന്തപുരം: ഹോസ്റ്റല് കര്ഫ്യൂവിനെതിരെ ഹൈക്കോടതിയെ സമീപിച്ച് കോതമംഗലം മാര് അത്തനേഷ്യസ് കോളേജിലെ വിദ്യാര്ഥിനികള്. വൈകിട്ട് 6.30 വരെയാണ് ഹോസ്റ്റലില് കയറാന് അനുവദിച്ചിരിക്കുന്ന സമയമെന്നും ഇത് ലിംഗ വിവേചനപരമായ തീരുമാനമാണെന്നും വിദ്യാര്ഥിനികള് ഹര്ജിയില് ആരോപിക്കുന്നു.
2019ല് കേരളത്തിലെ സര്വ്വകലാശാലകള്ക്ക് കീഴിലുള്ള എല്ലാ കോളേജുകളിലെയും വനിതാ ഹോസ്റ്റലുകളിലെ പ്രവേശന സമയം വൈകുന്നേരം 6.30 ആയിരിക്കണമെന്ന് സംസ്ഥാന സര്ക്കാര് ഉത്തരവിട്ടിരുന്നു. എന്നാല് സര്ക്കാര് പുറത്തിറക്കിയ മറ്റൊരു ഉത്തരവില് ലബോറട്ടറികള്, ലൈബ്രറി, ശില്പശാലകള്, ഗവേഷണ കേന്ദ്രങ്ങള്, കായിക സൗകര്യങ്ങള് എന്നിവ യാതൊരു നിയന്ത്രണങ്ങളുമില്ലാതെ രാത്രി 9.30 വരെ തുറന്നിരിക്കണമെന്നും പറയുന്നു. ഈ ഉത്തരവ് കോളേജ് ലംഘിച്ചെന്നാണ് വിദ്യാര്ഥിനികളുടെ വാദം. അതേസമയം ആണ്കുട്ടികളുടെ ഹോസ്റ്റലിലേക്കുള്ള പ്രവേശന സമയം രാത്രി 9 മണിയാണ്. അതിനാല് സര്ക്കാര് ഉത്തരവിന്റെ ആനുകൂല്യങ്ങള് ആണ്കുട്ടികള്ക്കും നിഷേധിക്കപ്പെട്ടെന്നും ഹര്ജിയില് പറയുന്നു.
