മലപ്പുറം : മുന് ഹരിത നേതാക്കളായ ഫാത്തിമ തഹ് ലിയ, മുഫീദ തെസ്നി, നജ്മ തബ്ഷീറ എന്നിവരെ ലീഗില് നിന്ന് പുറത്താക്കാന് നേത്യത്വത്തില് ആലോചന. എംഎസ്എഫ് പ്രസിഡന്റ് പി.കെ നവാസിനെതിരായ കോടതി നടപടികളുമായി മുന് ഹരിത നേതാക്കള് മുന്നോട്ട് പോകുന്ന സാഹചര്യത്തിലാണ് ലീഗ് നേതൃത്വം ഇവരെ പുറത്താക്കാനുള്ള ആലോചന നടത്തുന്നത്. ലോക്സഭ തെരഞ്ഞെടുപ്പ് അടുക്കുമ്പോള് മൂന്ന് പേരും എതിര് പാളയത്തിലേക്ക് പോകുമെന്ന വിലയിരുത്തലും ഒരു വിഭാഗം ലീഗ് നേതാക്കള്ക്കുണ്ട്. നേത്യത്വത്തില് നിന്ന് പുറത്താക്കിയതിന് ശേഷം മുമ്പ് ഒരിക്കലുമില്ലാത്ത തരത്തില് മുന്ഹരിത നേതാക്കള്ക്ക് പാര്ട്ടി വേദികള് ലഭിക്കുന്നതില് ചില ലീഗ് നേതാക്കള് അസ്വസ്ഥരാണ്.
ലീഗില് ഉറച്ച് നിന്നതിന് ശേഷം, വരുന്ന ലോക്സഭാ തിരഞ്ഞെടുപ്പ് അടുക്കുമ്പോള് ഫാത്തിമയും, മുഫീദയും, നജ്മയും എല്ഡിഎഫിനൊപ്പം ചേരുമെന്ന വിലയിരുത്തല് സാദിഖലി തങ്ങളും പിഎംഎ സലാമും അടക്കമുള്ള നേതാക്കള്ക്കുണ്ട്. ഇപ്പോഴേ പുറത്താക്കിയാല് ആ സമയത്ത് പാര്ട്ടി പ്രതിസന്ധിയിലാകില്ലെന്ന നിലപാടിലാണ് ഇവര്. പി.കെ നവാസിനെതിരായ കോടതി നടപടികള് അടുത്ത മാസം തുടങ്ങാനിരിക്കേ ആ കാരണം പറഞ്ഞ് പുറത്താക്കാമെന്നാണ് നിലവിലെ ആലോചന. ഏറ്റവും അവസാനം നടന്ന ലീഗ് സംസ്ഥാന ഭാരവാഹികളുടെ യോഗത്തില് വിഷയം ചര്ച്ചയായിരുന്നു. എംഎസ്എഫ് സംസ്ഥാന ജനറല് സെക്രട്ടറി ലത്തീഫ് തുറയൂരടക്കമുള്ളവര്ക്കെതിരെ നടപടിയെടുത്തതിനെത്തുടര്ന്നുള്ള ചര്ച്ചകള് അവസാനിച്ച ശേഷം മുന് ഹരിത നേതാക്കളെ പുറത്താക്കാനാണ് തീരുമാനം. ഒരു വിഭാഗം സംസ്ഥാന നേതാക്കള്ക്ക് എതിര്പ്പുണ്ടങ്കിലും നിലവിലെ സാഹചര്യത്തില് അത് ഉയര്ത്താന് സാധ്യത കുറവാണ്.
