തിരുവനന്തപുരം : കോവിഡ് ബാധിതനായി വീട്ടില് കഴിഞ്ഞിരുന്ന മന്ത്രി ജി.ആര് അനിലിനെ മെഡിക്കല് കോളേജ് ആശുപത്രിയില് പ്രവേശിപ്പിച്ചു. പ്രമേഹത്തിന്റെ അളവ് ക്രമാതീതമായി ഉയര്ന്നതിനെ തുടര്ന്നാണ് ഇന്നലെ രാവിലെ 10 മണിയോടെ ആശുപത്രിയില് എത്തിയത്. ആരോഗ്യനില തൃപ്തികരമാണ്. ഞായറാഴ്ച കോവിഡ് സ്ഥിരീകരിച്ച മന്ത്രിയെ ആരോഗ്യവകുപ്പില് നിന്ന് ആരും തിരിഞ്ഞുനോക്കിയില്ലെന്ന് ഇന്നലെ റിപ്പോര്ട്ട് ചെയ്തിരുന്നു. പിന്നാലെ ജില്ലാ മെഡിക്കല് ഓഫീസര് ഉള്പ്പെടെയുള്ളവര് ഔദ്യോഗിക വസതിയില് എത്തിയെങ്കിലും വിശ്രമത്തിലായിരുന്ന മന്ത്രിയെ കാണാന് കഴിയാതെ മടങ്ങി.
തുടര്ന്ന് മന്ത്രി മെഡിക്കല് കോളേജിലെ ഡോക്ടര്മാരെ ബന്ധപ്പെട്ട് ആശുപത്രിയിലേക്ക് പോയതെന്നാണ് വിവരം. മന്ത്രിമാരും വി.ഐ.പികളുമൊക്കെ രോഗബാധിതരായാല് ജില്ലാ മെഡിക്കല് ഓഫീസര് നിയോഗിക്കുന്ന സംഘം അവരെ പരിശോധിച്ച് ആരോഗ്യനില ഉറപ്പാക്കണമെന്നിരിക്കെ അനിലിന്റെ ആരോഗ്യനില പരിശോധിക്കാന് ആരോഗ്യവകുപ്പ് നടപടി സ്വീകരിക്കാത്തതില് വിമര്ശനം ഉയര്ന്നിരുന്നു.
