ന്യൂഡൽഹി: പ്രമുഖ അഭിഭാഷകനും ഇന്ത്യയുടെ സോളിസിറ്റർ ജനറലുമായിരുന്ന ഹരീഷ് സാൽവെ വീണ്ടും വിവാഹിതനാവുന്നു. ലണ്ടൻ സ്വദേശിയും ചിത്രകാരിയുമായ കരോലിൻ ബ്രോസാർഡാണ് അറുപത്തഞ്ചുകാരനായ സാൽവെയുടെ പ്രതിശ്രുത വധു. അടുത്തയാഴ്ചയാണ് വിവാഹം.
ഈ വർഷം ജൂണിലാണ് ഭാര്യ മീനാക്ഷിയുമായുള്ള ബന്ധം ഹരീഷ് സാൽവെ പിരിഞ്ഞത്. 38 വർഷങ്ങൾക്കു മുൻപായിരുന്നു ഇരുവരുടെയും വിവാഹം. നോർത്ത് ലണ്ടനിലാണ് ഹരീഷ് സാൽവെ ഇപ്പോൾ താമസിക്കുന്നത്. ഒരു കലാപരിപാടിയിൽ വെച്ചാണ് ബ്രോസാർഡിനെ ആദ്യമായി സാൽവെ കണ്ടുമുട്ടുന്നത്. കഴിഞ്ഞ ഒരു വർഷമായി ഇരുവരും പരിചയത്തിലായിരുന്നു.
ഇംഗ്ലണ്ടിലെയും വെയ്ൽസിലെയും ക്വീൻസ് കൗണ്സിൽ ആകുന്നതിന് മുന്പ് ഇന്ത്യയുടെ മുൻ സോളിസിറ്റർ ജനറൽ ആയിരുന്നു ഹരീഷ് സാൽവെ. ബ്രോസാർഡിന് 18-കാരിയായ മകളുണ്ട്. സാൽവെയ്ക്ക് രണ്ടു പെണ്മക്കളാണ് സാക്ഷിയും സാനിയയും. കുൽഭൂഷൻ ജാദവ് കേസിൽ ഇന്ത്യയ്ക്കായി രാജ്യാന്തര നീതിന്യായ കോടതിയിൽ സാൽവെയാണ് ഹാജരായിരുന്നത്.