അടൂര് : അടൂര് എക്സൈസ് റെയ്ഞ്ച് യൂണിറ്റും എക്സൈസ് ഇന്റലിജന്സ് സംഘവും ചേര്ന്ന് നടത്തിയ പരിശോധനയില് വീട് കേന്ദ്രീകരിച്ച് നടത്തി വന്നിരുന്ന വാറ്റ് കേന്ദ്രം പിടികൂടി. സംഭവത്തില് പ്രതിയായ കലഞ്ഞൂര് പാടം സ്വദേശി ബംഗ്ലാവ് മുരുപ്പേല് വടക്കേതില് വീട്ടില് ഉഷ (62)യെ എക്സൈസ് അറസ്റ്റ് ചെയ്തു. നിയമസഭാ തിരഞ്ഞെടുപ്പിനോടനുബന്ധിച്ച് നടത്തിയ പരിശോധനയിലാണ് വാറ്റ് കേന്ദ്രം പിടികൂടിയത്. വീട് കേന്ദ്രീകരിച്ച് വ്യാജ വാറ്റ് നടക്കുന്നു എന്ന് എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തില് ഉഷയെ നിരീക്ഷിച്ചു വരികയായിരുന്നു. മൂന്നര ലിറ്റര് ചാരായവും അറുപത് ലിറ്റര് വാഷും വാറ്റുപകരണങ്ങളും പ്രതിയില് നിന്നും പിടിച്ചെടുത്തു.
തിരഞ്ഞെടുപ്പിനോട് അനുബന്ധിച്ച് വില്പന നടത്താനാണ് ചാരായം വാറ്റിയതെന്ന് ഇവര് എക്സൈസിനോട് സമ്മതിച്ചു. ഉഷയെ കൂടാതെ കൂടുതല് പേര് കുറ്റകൃത്യത്തില് ഉള്പ്പെട്ടിട്ടുണ്ടോ എന്ന് എക്സൈസ് പരിശോധിച്ച് വരികയാണ്. റെയ്ഡില് എക്സൈസ് റെയ്ഞ്ച് ഇന്സ്പെക്ടര് ശ്രാവണ്, അസിസ്റ്റന്റ് എക്സൈസ് ഇന്സ്പെക്ടര്മാരായ ഹുസൈന് മുഹമ്മദ്, ബൈജു കെ.എന്, പ്രിവന്റിവ് ഓഫീസര്മാരായ അസീസ് എം, അനോജ് എം.എന് , ഹരീഷ് കുമാര്, വനിതാ സിവില് എക്സൈസ് ഓഫീസര് ഹസീന ബി.എച്ച് എന്നിവര് പങ്കെടുത്തു.
