വാരണസി : ഗംഗാ നദിയിലെ മലിനീകരണത്തിന്റെ പ്രധാന കാരണം ഫാക്ടറികളാണ്. ലോക്ക് ഡൗണ്‍ കാരണം എല്ലാം അടച്ചുപൂട്ടിയതോടെ സ്ഥിതി മെച്ചപ്പെട്ടു. ഗംഗയില്‍ 40 -50 ശതമാനം പുരോഗതി ഞങ്ങള്‍ കണ്ടു. ഇത് ഒരു സുപ്രധാന സംഭവമാണെന്ന് ഐഐടിബിഎച്ച്‌യു കെമിക്കല്‍ എഞ്ചിനീയറിംഗ് ആന്‍ഡ് ടെക്‌നോളജി പ്രൊഫസര്‍ ഡോ. പി കെ മിശ്ര പറഞ്ഞു. ഇന്ത്യ മുഴുവന്‍ കൊവിഡ് ഭീതിയിലാണ്. രോഗത്തിന് ഇതുവരെ ഫലപ്രദമായ വാക്‌സിന്‍ കണ്ടെത്താത്തത് ജനങ്ങളുടെ ആശങ്ക കൂട്ടിക്കൊണ്ടിരിക്കുകയാണ്. എന്നാല്‍ ഈ സമയത്ത് വാരണസിയില്‍ കൗതുകകരമായ ഒരു മാറ്റം ഉണ്ടായി. അത് മറ്റൊന്നുമല്ല ജനങ്ങള്‍ വീട്ടിനുള്ളിലായതോടെ ഗംഗാ നദിയുടെ ഗുണനിലവാരം അമ്പത് ശതമാനത്തോടെ മെച്ചപ്പെട്ടു. കൂടാതെ ഗംഗയെ ആരാണ് ഇത്രയും കാലം മലിനപ്പെടുത്തിയിരുന്നതെന്ന് കണ്ടെത്താനും സാധിച്ചു.
“ലോക്ക് ഡൗണ്‍ സമയത്ത് ഗംഗാ നദിയിലെ വെള്ളം ശുദ്ധമായിത്തീര്‍ന്നിരിക്കുന്നു. ഗംഗാ നദിയിലെ ശുദ്ധജലം നോക്കുമ്പോള്‍ ഞങ്ങള്‍ക്ക് സന്തോഷമുണ്ട്.”- നാട്ടുകാരന്‍ പറഞ്ഞു. ‘മാര്‍ച്ച്‌ 15-16 തീയതികളില്‍ മഴയെത്തുടര്‍ന്ന് ഗംഗയില്‍ ജലനിരപ്പും വര്‍ദ്ധിച്ചു, അതിനര്‍ത്ഥം അതിന്റെ ശുചീകരണ ശേഷിയും വര്‍ദ്ധിച്ചു എന്നാണ്. ലോക്ക് ഡൗണിന് മുമ്പുള്ള കാലഘട്ടവും അതിന് ശേഷവും നോക്കിയാല്‍ ഗണ്യമായ പുരോഗതിയുണ്ടെന്നും അദ്ദേഹം പറഞ്ഞു.
