ന്യൂഡല്‍ഹി : തിരുവനന്തപുരം സ്വര്‍ണ കടത്തു കേസിലെ പ്രതി ഫൈസല്‍ ഫരീദിന്റെ പാസ്സ്‌പോര്‍ട്ട് റദ്ദാക്കി. കസ്റ്റംസിന്റെ നിര്‍ദേശമനുസരിച്ച്‌ കേന്ദ്ര വിദേശ കാര്യമന്ത്രാലയമാണ് പാസ്സ്‌പോര്‍ട്ട് റദ്ദാക്കിയത്. കേന്ദ്ര ആഭ്യന്തര മന്ത്രാലയത്തെയും ബ്യൂറോ ഓഫ് എമിഗ്രേഷനെയും ഇത് അറിയിച്ചു. ഫൈസല്‍ ഫരീദിനെ എത്രയുംപെട്ടെന്ന് ഇന്ത്യയിലെത്തിക്കാനുള്ള നടപടിയുടെ ഭാഗമായാണ് കേന്ദ്ര നടപടി. പാസ്സ്‌പോര്‍ട്ട് റദ്ദാക്കിയതോടെ ഫൈസല്‍ ഫരീദിന് യു.എ.ഇയില്‍നിന്ന് മറ്റൊരു രാജ്യത്തേക്ക് കടന്നുകളയാനുള്ള സാധ്യതയും അടയും.
ഫൈസല്‍ ഫരീദാണ് നയതന്ത്ര ബാഗേജ് എന്നപേരില്‍ സ്വര്‍ണ്ണം അയച്ചതെന്ന് നേരത്തെ കണ്ടെത്തിയിരുന്നു, എന്നാല്‍ ആരോപണം നിഷേധിച്ചു ഫൈസല്‍ ഫരീദ് രംഗത്തെത്തിയെങ്കിലും മണിക്കൂറുകള്‍ക്കകം ദുബായിലെ താമസസ്ഥലത്ത് നിന്ന് ഇയാളെ കാണാതാവുകയായിരുന്നു. ഇയാള്‍ക്കെതിരെ എന്‍ ഐ എ കോടതി ജാമ്യമില്ലാ വാറണ്ടും പുറപ്പെടുവിച്ചിരുന്നു.
