കോട്ടയം : വ്യാജ വിലാസത്തില് മുക്കുപണ്ടം പണയം വെച്ച് പണം തട്ടിയ സംഘത്തെ പോലീസ് പിടികൂടി. ഉരച്ചു നോക്കിയാലും സ്വര്ണപ്പണിക്കാര്ക്കു പോലും തിരിച്ചറിയാന് കഴിയാത്ത വിധം വൈദഗ്ധ്യത്തോടുകൂടി മുക്കുപണ്ടം നിര്മ്മിച്ച് കിടങ്ങൂരുള്ള സ്വകാര്യ പണമിടപാട് സ്ഥാപനത്തില് പണയം വച്ച് 7000 രൂപ തട്ടിയെടുത്ത കേസിലെ പ്രതികളെയാണ് കിടങ്ങൂര് പോലീസ് പിടികൂടിയത്.
ഈരാറ്റുപേട്ട സ്വദേശികളായ പൂഞ്ഞാര് കരോട്ട് വീട്ടില് മുഹമ്മദ് ഷിജാസ് (20), പൂഞ്ഞാര് വെള്ളാപ്പള്ളിയില് വീട്ടില് മുഹമ്മദ് റാഫി (21), നടയ്ക്കല് വലിയ വീട്ടില് മുഹമ്മദ് ഷാഫി (20) എന്നിവരാണ് പിടിയിലായത്. കാക്കനാട്ടെ ഒളിസങ്കേതത്തില് നിന്നാണ് പ്രതികളെ പിടികൂടിയത്. അന്വേഷണത്തെ വഴി തിരിച്ചുവിടാനായി പ്രതികള് ‘ദൃശ്യം’ സിനിമ മോഡലില് ഒരു പ്രതിയുടെ സിം കാര്ഡ് മറ്റൊരു മൊബൈല് ഫോണിലിട്ട് ലോറിയില് കയറ്റി വിട്ടിരുന്നു. എന്നാല് പഴുതടച്ച അന്വേഷണത്തിലൂടെ പോലീസ് പ്രതികളെ പിടികൂടുകയായിരുന്നു.
പ്രതികള്ക്കെതിരെ കിടങ്ങൂര് പോലീസ് സ്റ്റേഷനില് രണ്ടു കേസും ഈരാറ്റുപേട്ട, എരുമേലി, തൊടുപുഴ പോലീസ് സ്റ്റേഷനുകളില് ഓരോ കേസ് വീതവും സമാന രീതിയിലുള്ള കുറ്റകൃത്യത്തിനു നിലവിലുണ്ട്. സംസ്ഥാനത്തിന്റെ വിവിധ ഭാഗങ്ങളിലായി വ്യാജ രേഖയിലൂടെ പ്രതികള് ലക്ഷങ്ങള് തട്ടിയെടുത്തതായി സംശയിക്കുന്നുവെന്ന് കിടങ്ങൂര് പോലീസ് ഇന്സ്പെക്ടര് സിബി തോമസ് പറഞ്ഞു.
