തിരുവനന്തപുരം: കാര്ഷിക പ്രതിസന്ധി ചര്ച്ച ചെയ്യണമെന്നാവശ്യപ്പെട്ട് പ്രതിപക്ഷം കൊണ്ടുവന്ന അടിയന്തര പ്രമേയ നോട്ടീസ് തള്ളി. നെല്ല് സംഭരിച്ചതിന്റെ തുക വൈകിയതിന് ഉത്തരവാദി സപ്ലൈകോ ആല്ലെന്നും പണം നല്കാതെ ബാങ്കുകള് സപ്ലൈകോ നടപടിയെ അട്ടിമറിക്കാന് ശ്രമിച്ചെന്നും കൃഷിമന്ത്രി പി പ്രസാദ് ആരോപിച്ചു. പണം കിട്ടിയ കൃഷ്ണപ്രസാദിന്റെ പേരില് ജയസൂര്യ പുതിയ തിരക്കഥ ഉണ്ടാക്കാന് ശ്രമിച്ചെന്നും കൃഷിമന്ത്രി മന്ത്രി സഭയില് വ്യക്തമാക്കി. കര്ഷക പ്രശ്നം ജയസൂര്യ പറഞ്ഞപ്പോള് നടന്റെ മേല് കുതിര കയറാന് സൈബര് സംഘങ്ങളെ വെച്ചുവെന്ന് സണ്ണി ജോസഫ് എംഎല്എ ആരോപിച്ചു.
കാര്ഷിക പാക്കേജ് പ്രഖ്യാപിക്കണമെന്നും സണ്ണി ജോസഫ് ആവശ്യപ്പെട്ടു. പ്രതിപക്ഷം വസ്തുതകള് വളച്ചൊടിക്കുകയാണെന്ന് കൃഷിമന്ത്രി തിരിച്ചടിച്ചു. സണ്ണി ജോസഫ് പറഞ്ഞത് രാഷ്ട്രീയമാണ്. റബര് കര്ഷകരുടെ കാര്യത്തില് കേന്ദ്ര സഹായം പോലും ഇല്ലാതെ 1914.15 കോടി സംസ്ഥാനം നല്കി. സണ്ണി ജോസഫ് കേന്ദ്രത്തിനെതിരെ ഒന്നും പറയുന്നില്ലെന്നും കൃഷി മന്ത്രി വിമര്ശിച്ചു. നെല്ല് സംഭരണത്തില് പണം കൊടുത്തുതീര്ത്ത് വരുന്നുകയാണെന്നും കൃഷിമന്ത്രി സഭയില് പറഞ്ഞു. മേല് നോട്ടത്തിനായി ഒരു ക്യാബിനറ്റ് ഉപസമിതി രൂപീകരിച്ചിട്ടുണ്ടെന്നും മന്ത്രി വ്യക്തമാക്കി.
