തമിഴ്നടന് ശിവകാര്ത്തികേയന്റെ “ഡോണ്” എന്ന സിനിമയുടെ ചിത്രീകരണം നിര്ത്തി വെച്ചു. കൊവിഡ് മാനദണ്ഡം ലംഘിച്ചതിനാണ് ചിത്രീകരണം നിർത്തി വെച്ചത്. ആനമല മുക്കോണം പാലം ഭാഗത്ത് നടത്തിയ ചിത്രീകരണമാണ് നിര്ത്തിയത്. ചിത്രീകരണ വിവരമറിഞ്ഞ് സാമൂഹിക അകലം പാലിക്കാതെയും, മുഖാവരണം, ധരിക്കാതെയും അഞ്ഞൂറിലധികം പേര് ശിവകാര്ത്തികേയനെ കാണാന് തടിച്ചുകൂടി. പാലത്തിനരികില് സിനിമാസംഘത്തിന്റെ നിര്ത്തിയിട്ട വാഹനങ്ങളും ഗതാഗത തടസ്സവുമുണ്ടാക്കി.
സ്ഥലത്തെത്തിയ പോലീസുകാരും, തഹസില്ദാര് വിജയകുമാറുമാണ് സിനിമാ ചിത്രീകരണം നിര്ത്തി വെപ്പിച്ചത്. കൊവിഡ് മാനദണ്ഡം ലംഘിച്ച് ചിത്രീകരണം നടത്തിയതിന് തഹസില്ദാര് 19,400 രൂപ പിഴയും ചുമത്തി. കോവിഡ് പ്രോട്ടോകോള് പാലിക്കാത്തതിനും, നിയമാനുസൃതമല്ലാതെ സിനിമാചിത്രീകരണം നടത്തിയതിനും, ഗതാഗത തടസ്സമുണ്ടാക്കിയതിനും, സംവിധായകന് സിബി ചക്രവര്ത്തിയടക്കം മുപ്പതോളം പേര്ക്കെതിരേ പോലീസ് കേസെടുത്തു.
