ഇംഫാല്‍: സൈന്യവുമായുണ്ടായ ഏറ്റുമുട്ടലില്‍ കൊല്ലപ്പെട്ടയാളുടെ മൃതദേഹവുമായി ജനം തെരുവില്‍ ഇറങ്ങിയതോടെ മണിപ്പുരില്‍ വന്‍ സംഘര്‍ഷം. വൈകിട്ട് ഏഴു മണിയോടെ ഇംഫാല്‍ നഗരത്തിലാണ് വന്‍സംഘര്‍ഷമുണ്ടായത്. കാങ്‌പോക്പിയില്‍ കൊല്ലപ്പെട്ടയാളുടെ മൃതദേഹവുമായി ഇംഫാല്‍ മാര്‍ക്കറ്റ് ഏരിയയിലെത്തിയ ആയിരത്തിലധികം വരുന്ന മെയ്‌തെയ് ജനക്കൂട്ടം കലാപം സൃഷ്ടിച്ചതിനെത്തുടര്‍ന്ന് പോലീസ് കണ്ണീര്‍വാതകം പ്രയോഗിച്ചു. റോഡുകളും മറ്റും ടയറുകള്‍ കൂട്ടിയിട്ട് തീയിട്ട് തടഞ്ഞിരിക്കുകയാണ്.
ഇതിനിടെ വൈകീട്ട് നാല് മണിയോടെ ഹരോതെല്‍ ഗ്രാമത്തില്‍ വീണ്ടും വെടിവയ്പ്പുണ്ടായി. കാങ്‌പോക്പി ജില്ലയില്‍ സൈന്യവും കലാപകാരികളും തമ്മിലുണ്ടായ ഏറ്റുമുട്ടലിലാണ് രാവിലെ ഒരാള്‍ കൊല്ലപ്പെട്ടത്. കുക്കികളുടെ ഗ്രാമമായ ഹരോതെലില്‍ ആക്രമണമുണ്ടായതോടെ ഇന്ന് രാവിലെ 5.30നാണ് സൈന്യം ഇവിടെ എത്തിയത്. സൈന്യത്തിനുനേരെ ആയുധധാരികള്‍ വെടിവയ്ക്കുകയായിരുന്നുവെന്ന് സൈനിക വക്താവ് അറിയിച്ചു. വെടിവയ്പ്പ് രൂക്ഷമായതോടെ കൂടുതല്‍ സൈന്യം സംഭവസ്ഥലത്തേക്ക് എത്തുകയായിരുന്നു. രാവിലെ 9 മണിവരെ ഏറ്റുമുട്ടല്‍ തുടര്‍ന്നു. മെയ്‌തെയ് വിഭാഗത്തില്‍പ്പെട്ടയാളാണ് കൊല്ലപ്പെട്ടത്. നിരവധിപ്പേര്‍ക്ക് പരുക്കേറ്റതായും സൈനിക വക്താവ് അറിയിച്ചു.
