വടകര : അത്യാഹിതങ്ങള്‍ക്കായി വിളിക്കേണ്ട ഫയര്‍ ഫോഴ്സിലേക്ക് അനാവശ്യമായി വിളിച്ചാല്‍ പോലീസിന്‍റെ പിടി വീഴും. കഴിഞ്ഞ ദിവസം വടകര ഫയര്‍ സ്റ്റേഷനില്‍ അത്യാഹിത ആവശ്യങ്ങള്‍ക്കായി മാത്രം ഉപയോഗിക്കുന്ന 101 എന്ന നമ്പറിലേക്ക് നിരന്തരം വിളിച്ച പുറമേരി സ്വദേശി ഉദ്യോഗസ്ഥര്‍ ഫോണ്‍ എടുത്താല്‍ ഒന്നും സംസാരിക്കാതെ ഫോണ്‍ കട്ട് ചെയ്യുകയുണ്ടായി.
ഉദ്യോഗസ്ഥര്‍ പലതവണ ഉപദേശിച്ചിട്ടും യുവാവ് ഫോണ്‍വിളി തുടരുകയായിരുന്നു. ഇതേത്തുടര്‍ന്ന് ഫയര്‍ ഫോഴ്‌സ് അധികൃതര്‍ ജില്ല പോലീസ് ആസ്ഥാനത്തെ സൈബര്‍ ടീമിന് പരാതി നല്‍കി. അടുത്തദിവസംതന്നെ യുവാവ് പോലീസിന്‍റെ പിടിയിലായി. കേസ് എടുക്കരുതെന്നും ഇനി അവര്‍ത്തിക്കില്ലെന്നും സ്റ്റേഷന്‍ ഓഫിസറോട് അപേക്ഷിച്ച യുവാവിനെ താക്കീതോടെ പറഞ്ഞുവിടുകയായിരുന്നു.
അത്യാഹിതങ്ങള്‍ക്ക് ആയി 24 മണിക്കൂര്‍ ഉപയോഗിക്കുന്ന 101 എന്ന നമ്പറിലേക്ക് ഇത്തരം അനാവശ്യ കാളുകള്‍ കടന്നുവരുന്നതിലൂടെ നഷ്ടപ്പെടുന്നത് ജീവന്‍ രക്ഷക്കായി സ്റ്റേഷനിലേക്ക് വിളിക്കുന്ന അനേകം ആളുകള്‍ക്ക് ലഭിക്കുന്ന ജീവന്‍രക്ഷ സഹായവും വിലപ്പെട്ട ജീവനുമാണ്. ഇത്തരം പ്രവണതകള്‍ ആവര്‍ത്തിക്കരുതെന്നും കുട്ടികള്‍ക്ക് കളിക്കാന്‍ തങ്ങളുടെ ഫോണ്‍ നല്‍കരുതെന്നും വടകര ഫയര്‍ ആന്‍ഡ് റെസ്‌ക്യു സ്റ്റേഷന്‍ ഓഫിസര്‍ കെ.അരുണ്‍ പറഞ്ഞു.
