ആലപ്പുഴ : രണ്ടു വയസ്സുകാരന്റെ തലയില് കുടുങ്ങിയ കലം അഗ്നിശമന സേന മുറിച്ചുനീക്കി. തത്തംപള്ളി സ്വദേശി ചാക്കോ ജോണിന്റെ മകന് മെല്വിന് ചാക്കോ എന്ന കുട്ടിയുടെ തലയാണ് കലത്തിനുള്ളില് കുടുങ്ങിയത്. വീട്ടുകാര് പലവിധത്തില് ശ്രമിച്ചു നോക്കിയിട്ടും കലം ഊരിമാറ്റാന് കഴിയാതായതോടെ അസ്വസ്ഥനായ കുട്ടിയെ പിതാവ് അഗ്നിശമന സേനാ നിലയത്തില് എത്തിക്കുകയായിരുന്നു. സേനാംഗങ്ങള് ഷിയേഴ്സ്, കട്ടര് മുതലായ ഉപകരണങ്ങള് ഉപയോഗിച്ച് 10 മിനുട്ട് കൊണ്ട് കുട്ടിക്ക് യാതൊരു പോറലുമേല്ക്കാതെ കലം ഊരിയെടുത്തു. ബൈജു പണിക്കരുടെ നേതൃത്വത്തില് ബദറുദ്ദീന്, ജോസഫ്, കബീര്, ജിജോ ആന്റണി, യേശുദാസ്, ശുഹൈബ്, സനല്കുമാര്, സുകു എന്നിവര് ചേര്ന്നാണ് രക്ഷാപ്രവര്ത്തനം നടത്തിയത്.
