കോന്നി : മലയാലപ്പുഴയില് തെരുവ് നായയുടെ ആക്രമണത്തില് കുട്ടികള് ഉള്പ്പെടെ അഞ്ച് പേര്ക്ക് പരിക്കേറ്റു. മലയാലപ്പുഴ കിഴക്കേപുറത്ത് ദീപു പി.ജി(44), കൃഷ്ണ ഭവനം കൃഷ്ണ(8), പ്ലാവറ വീട്ടില് ദ്രുവ് രഞ്ജിത്ത്(5), പ്ലാവറ വീട്ടില് ശാന്തമ്മ (67), കിഴക്കേപുന്നാട്ട് ശാന്തമ്മ സി.ആര് (72) എന്നിവര്ക്കാണ് പരിക്കേറ്റത്. ഇവരെ പത്തനംതിട്ട ജനറല് ആശുപത്രിയില് എത്തിച്ച് ചികിത്സ നല്കി. ഇന്നലെ വൈകുന്നേരത്തോടെ ആയിരുന്നു നായയുടെ ആക്രമണം നടന്നത്. മലയാലപ്പുഴ മുഹൂര്ത്തിക്കാവ് ഭാഗത്താണ് തെരുവ് നായ ആദ്യം ആക്രമിച്ചത്. പിന്നീട് ആനചാരിക്കല്, പുതുക്കുളം ഭാഗത്തുള്ളവര്ക്കും നായയുടെ കടിയേറ്റു.
പ്രദേശവാസികളെ കടിച്ചതിന് ശേഷം വളര്ത്തുനായകളെയും തെരുവ് നായ ആക്രമിച്ചു, ഇതിന് ശേഷം നായ ചത്തുപോവുകയും ചെയ്തു. തെരുവ് നായയക്ക് പേ വിഷബാധയുണ്ടെന്നാണ് സംശയം. ഇത് സ്ഥിരീകരിക്കുന്നതിനായി നായയുടെ സാമ്പിളുകള് പരിശോധിക്കാന് മലയാലപ്പുഴ പഞ്ചായത്ത് പ്രസിഡന്റ് വെറ്റിനറി ഉദ്യോഗസ്ഥര്ക്ക് നിര്ദ്ദേശം നല്കി. പരിശോധന ഫലം പുറത്ത് വന്നതിന് ശേഷമേ പേ വിഷബാധ സ്ഥിരീകരിക്കാന് കഴിയു. കൂടുതല് ആളുകള് നായയുടെ ആക്രമണത്തിന് ഇരയായിട്ടുണ്ടോ എന്ന് ആരോഗ്യ വകുപ്പ് അന്വേഷണം നടത്തിവരികയാണ്.
