പന്തളം : വെള്ളപ്പൊക്കത്തില് വാളകത്തിനാല് പുഞ്ചയിലേക്ക് വെള്ളം എത്തിക്കുന്നതിനുള്ള കലുങ്കും മന്നം ഷുഗര് മില്സ് റോഡിനെയും മങ്ങാരം പാലത്തടം, കുരീക്കാവ് ഭാഗങ്ങളെയും ബന്ധിപ്പിക്കുന്ന പുഞ്ച-മണക്കുപ്പ റോഡും തകര്ന്നു. 2018-മുതലുള്ള വെള്ളത്തിന്റെ ശക്തമായ ഒഴുക്കാണ് കലുങ്കും റോഡും തകരാന് കാരണം. മുട്ടാര് നീര്ച്ചാല് അവസാനിക്കുന്ന ഭാഗമാണ് വാളകത്തിനാല് പുഞ്ച. വെള്ളം ആവശ്യാനുസരണം പാടത്തേക്ക് തുറന്നുവിടുന്നതിനായി നിര്മ്മിച്ചിരുന്നതാണ് ഇവിടെയുള്ള ഷട്ടര്. പലകയിളകി ഇത് ഉപയോഗശൂന്യമായതോടെ വെള്ളപ്പൊക്കമുള്ള സമയത്ത് വാളകത്തിനാല് പുഞ്ചയില്നിന്ന് മുട്ടാര് നീര്ച്ചാലിലേക്ക് വെള്ളം വളരെവേഗം ഒഴുകിയെത്താനും സമീപത്തുള്ള വീടുകള് വെള്ളത്തിലാകാനും കാരണമാകുന്നു.
