തൃശൂര് : കാണാതായ ഫുട്ബാള് കണ്ടെത്തിത്തരണമെന്ന് പോലീസ് സ്റ്റേഷനിലേക്ക് ഫോണില് അഞ്ചാം ക്ലാസുകാരന്റെ സങ്കടപ്പരാതി. സാരമില്ലെന്നറിയിച്ച പോലീസ് പകരം ഫുട്ബാള് വാങ്ങിത്തരാമെന്ന് പറഞ്ഞെങ്കിലും അതുല് വഴങ്ങിയില്ല. പ്രിയപ്പെട്ട ഫുട്ബാള് തന്നെ വേണം. അമ്മയുടെ ഫോണ് ഉപയോഗിച്ച് ഇന്റര്നെറ്റില് പരതിയാണ് കോടത്തൂര് കോണംപ്ലാക്കല് സുധീഷിന്റെ മകന് പത്തു വയസ്സുകാരന് അതുല് പഴയന്നൂര് പോലീസ് സ്റ്റേഷന്റെ നമ്പര് കണ്ടെത്തിയത്. മകന് ഫോണില് ആരോടോ പരാതി പറയുന്നത് കേട്ടാണ് അമ്മ പ്രിയ ശ്രദ്ധിച്ചത്.
പോലീസ് സ്റ്റേഷനിലേക്കാണെന്ന് അറിഞ്ഞപ്പോള് പ്രിയയുടെ ഉള്ളൊന്ന് കാളി. മകന് വളരെ പ്രിയപ്പെട്ട ഫുട്ബാളാണ് രണ്ടുദിവസം മുമ്പ് കാണാതായത്. അതിന്റെ വിഷമത്തില് വിളിച്ചതാണെന്നും ക്ഷമിക്കണമെന്നും അവര് ഫോണ് വാങ്ങി പോലീസിനെ അറിയിച്ചു. ഒടുവില് പരാതിയുടെ ഗൗരവം കണക്കിലെടുത്ത് പോലീസ് അതുലിനോട് കാര്യങ്ങള് ചോദിച്ചറിഞ്ഞു അന്വേഷണം ഏറ്റെടുത്തു.
അനിയത്തി ആത്മജയെ ആശുപത്രിയില് കാണിക്കാന് കുടുംബസമേതം പോയ സമയത്ത് മുറ്റത്തുനിന്നാണ് ഫുട്ബാള് കാണാതായത്. അടുത്ത വീട്ടിലെ ഏഴാം ക്ലാസുകാരന് ഫുട്ബാള് എടുത്തവരെക്കുറിച്ച് സൂചനയും നല്കി.
അന്വേഷണത്തിനിടെ അതുല് രണ്ടുതവണ സ്റ്റേഷനിലേക്ക് വിളിച്ചപ്പോള് ഫുട്ബാള് കണ്ടെത്തുമെന്ന് പോലീസ് ആശ്വസിപ്പിച്ചു. ഒടുവില് സമീപത്തെ ഗ്രൗണ്ടില് കളിക്കാന് വന്ന മുതിര്ന്ന കുട്ടികളാണ് ഫുട്ബാള് എടുത്തതെന്ന് കണ്ടെത്തി. അതുലിന്റെ പ്രിയപ്പെട്ട ഫുട്ബാള് പോലീസ് അങ്ങനെ കണ്ടെത്തി തിരികെ നല്കി. എ.എസ്.ഐ പ്രദീപ്കുമാറിന്റെ നേതൃത്വത്തിലായിരുന്നു അന്വേഷണം.
