റാന്നി : മണ്ഡലകാല തീര്‍ത്ഥാടനം തുടങ്ങാന്‍ നാളുകള്‍ മാത്രം ശേഷിക്കെ ശബരിമല അനുബന്ധ പാതകള്‍ കാടുമൂടി കിടക്കുന്നതായി ആക്ഷേപം. റോഡരികിലെ കാടുകള്‍ തെളിക്കാനും മറ്റ് അടിസ്ഥാന സൗകര്യമൊരുക്കുന്നതിലും ബന്ധപ്പെട്ട വകുപ്പുകള്‍ ഉത്സാഹം കാട്ടുന്നില്ലെന്നാണ് ആരോപണം.
കഴിഞ്ഞ തീര്‍ഥാടന കാലത്ത് കോവിഡ് മൂലം വലിയ മുന്നൊരുക്കങ്ങള്‍ നടത്തിയിരുന്നില്ല. ഇത്തവണ കോവിഡ് വ്യാപനം കുറയുകയും തീര്‍ഥാടകരെ അനുവദിക്കുകയും ചെയ്ത പശ്ചാതലത്തില്‍ അടിയന്തര മുന്നൊരുക്കങ്ങള്‍ ചെയ്യേണ്ടതുണ്ട്.
ഹൈക്കോടതി നിര്‍ദ്ദേശിച്ച അനുബന്ധ പാതകളില്‍ ചുരുക്കം ചിലതൊഴിച്ചാല്‍ ബാക്കിയെല്ലാം ഉന്നത നിലവാരത്തില്‍ നിര്‍മ്മിച്ചിട്ടുണ്ട്. എന്നാല്‍ ഉന്നത നിലവാരത്തില്‍ നിര്‍മ്മിച്ച ഈ റോഡുകളുടെ വശങ്ങളും കാടു മൂടി കിടക്കുകയാണ്. ഇത്തരം റോഡുകളുടെ വശങ്ങള്‍ ഐറിഷ് വര്‍ക്ക് ചെയ്യണമെന്നാണ്.
ഇവിടെ ടാറിംങ് നടത്തിയതൊഴിച്ചാല്‍ മറ്റു നിര്‍മ്മാണങ്ങള്‍ ഒന്നും തന്നെ നടത്തിയിട്ടില്ല. ഉന്നത നിലവാരത്തില്‍ നിര്‍മ്മിച്ച മുക്കട – ഇടമണ്‍ – അത്തിക്കയം, അത്തിക്കയം-മടത്തുംമൂഴി,ചെത്തോങ്കര – അത്തിക്കയം,കനകപ്പലം – വെച്ചൂച്ചിറ,വെച്ചൂച്ചിറ – മടന്തമണ്‍ – അത്തിക്കയം,മന്ദിരം – വടശേരിക്കര,കോഴഞ്ചേരി – ബ്ലോക്കുപടി തുടങ്ങിയ റോഡുകളുടെ വശങ്ങള്‍ കാടുമൂടിയിരിക്കുകയാണ്.
വളവുകള്‍ കാടുമൂടിയതോടെ പല സ്ഥലത്തും അപകട സാധ്യതയേറെയാണ്. ചെറുകോല്‍പ്പുഴ-റാന്നി റോഡ് പുനരുദ്ധാരണം കാത്തുകിടക്കുകയാണ്. മഴ മാറാതിരുന്നാല്‍ ഈ പ്രവര്‍ത്തനങ്ങളെല്ലാം താറുമാറാവും.
മണ്ഡലകാലത്ത് ഇത്തവണ വെര്‍ച്ചല്‍ക്യൂ വഴി ദിവസം കാല്‍ ലക്ഷം പേര്‍ക്കായി പ്രവേശനം നിജപ്പെടുത്തിയിട്ടുണ്ട്. കഴിഞ്ഞ തവണത്തെക്കാള്‍ ഭക്തരുടെ തിരക്ക് വര്‍ദ്ധിക്കാന്‍ സാഹചര്യവുമുണ്ട്. അതിനാല്‍ അടിസ്ഥാന സൗകര്യമൊരുക്കുന്നതില്‍ വിട്ടുവീഴ്ച വരുത്തിയാല്‍ വലിയ പ്രതിസന്ധിക്കിട വരുത്തുമെന്നും തീര്‍ത്ഥാടകര്‍ക്ക് ആശങ്കയുണ്ട്.
