പത്തനംതിട്ട : കുമ്പഴ മല്ലശ്ശേരിമുക്കില് ഇലക്ട്രിക് പോസ്റ്റില് കയറിയ പെരുമ്പാമ്പിനെ വനപാലകര് എത്തി പിടികൂടി. കഴിഞ്ഞ രാത്രിയിലാണ് സംഭവം. പോസ്റ്റില് കൂടി കയറി ഏറ്റവും മുകള് ഭാഗത്ത് എത്തിയ പാമ്പ് ലൈന് കമ്പികള്ക്ക് മുകളിലായി നിലയുറപ്പിക്കുകയായിരുന്നു. സംഭവം ശ്രദ്ധയില്പ്പെട്ടയുടന് നാട്ടുകാര് കോന്നി ഫോറസ്റ്റ് റാപ്പിഡ് റെസ്പോണ്സ് സംഘത്തെ വിവരം ധരിപ്പിക്കുകയും ഇവര് സ്ഥലത്തെത്തി കെ.എസ്.ഇ.ബി ജീവനക്കാരുടെ സഹായത്തോടെ പാമ്പിനെ പിടികൂടുകയായിരുന്നു.
ലൈന് കമ്പികള്ക്ക് തൊട്ടടുത്ത് കൂടിയാണ് പാമ്പ് മുകളിലേക്ക് ഇഴഞ്ഞ് കയറിയത് എങ്കിലും പാമ്പ് ഷോക്കേല്ക്കാതെ രക്ഷപെടുകയായിരുന്നു. പുനലൂര് മൂവാറ്റുപുഴ സംസ്ഥാന പാതയുടെ സമീപത്തെ പോസ്റ്റിലാണ് പാമ്പ് കയറിയത്. അടുത്തിടെയായി ഇളകൊള്ളൂര്, പ്രമാടം, മല്ലശ്ശേരി ഭാഗങ്ങളില് നിന്നായി നിരവധി പെരുമ്പാമ്പുകളെ വനപാലകര് പിടികൂടിയിരുന്നു. ഏപ്രില് മാസത്തില് ഇളകൊള്ളൂരില് ഒരു വീട്ടില് നിന്നും ദിവസങ്ങളുടെ വ്യത്യാസത്തില് മൂന്ന് പെരുമ്പാമ്പുകളെയാണ് വനപാലകര് പിടികൂടിയത്.
