റാന്നി: ശബരിമല തീര്ത്ഥാടന മുന്നൊരുക്കത്തിന്റെ ഭാഗമായി പാതകളിലെ കാടുകള് തെളിച്ചു വൃത്തിയാക്കി.മുക്കട-ഇടമണ്-അത്തിക്കയം പാതയിലെ കാടുകളാണ് നീക്കം ചെയ്തത്. മുന് വര്ഷങ്ങളില് നിന്നും വ്യത്യസ്തമായി വൃത്തിയോടാണ് ഇത്തവണ കാടുകള് തെളിച്ചത്. മുന്കാലങ്ങളില് പേരിനു മാത്രമാണ് കാടുകള് നീക്കം ചെയ്തിരുന്നത്. ഇത് വ്യാപക പരാതിക്കിടയാക്കിരുന്നു. ശബരിമലയിലേക്കു പോകുന്നതും വരുന്നതുമായ എല്ലാ വലിയ വാഹനങ്ങളും ഈ പാത വഴിയാണ് കടന്നു പോകുന്നത്.
ഉന്നത നിലവാരത്തില് നിര്മ്മിച്ച പാതയില് ചിലയിടങ്ങളില് ക്രാഷ് ബാരിയറുകളും സ്ഥാപിച്ചിട്ടുണ്ട്. പലപ്പോഴും തിരക്ക് നിയന്ത്രണതീതമാകാറുണ്ട് ഈ റൂട്ടില്. പ്രധാന ജംങ്ഷനുകളില് പോലീസിന്റെ സേവനം ആദ്യകാലങ്ങളില് ഉറപ്പാക്കിയിരുന്നെങ്കിലും ഇപ്പോഴതില്ല. ഗതാഗത കുരുക്കുണ്ടായാല് പലപ്പോഴും പ്രദേശവാസികളാണ് ഇടപെടുന്നത്. റൂട്ടില് പോലീസ് സേവനം ഉറപ്പാക്കണമെന്ന നാട്ടുകാരുടെ ആവശ്യത്തിന് പഴക്കമേറെയാണ്.
