റാന്നി : താലൂക്കാശുപത്രി പരിസരത്ത് ദുർഗന്ധം വ്യാപിക്കുന്നതായി പരാതി. കൂടാതെ പുതിയ കെട്ടിടത്തിലെ ക്യാഷ്വലിറ്റിക്കു മുൻഭാഗത്തു മലിനജലവും കെട്ടിക്കിടക്കുന്നതായും ആരോപണമുണ്ട്. ദിവസേന നൂറ് കണക്കിന് രോഗികളും കൂട്ടിരുപ്പുകാരും എത്തുന്ന ആശുപത്രി പരിസരം ഇത്രയും വൃത്തിഹീനമാകുന്നതിനു അധികൃതരുടെ ഭാഗത്തു നിന്ന് യാതൊരു നടപടിയും ഉണ്ടാകുന്നില്ലെന്നാണ് ഉയർന്നു വരുന്ന ആരോപണം. കക്കൂസ് മാലിന്യം പൊട്ടിയൊഴുകുന്നതാണ് ദുർഗന്ധം വ്യാപിക്കാൻ കാരണം എന്നാണ് ഇവിടെയെത്തുന്നവർ പറയുന്നത്. ചികിത്സ തേടിയെത്തുന്നവർക്കു ദുർഗന്ധം മൂലം ഇവിടെ ഇരിക്കാൻ കഴിയാത്ത അവസ്ഥയാണ്. അധികൃതരുടെ ഭാഗത്തു നിന്നും ഇതിനു അടിയന്തര പരിഹാരം ഉണ്ടാകണമെന്നാണ് രോഗികളുടെയും ഇവിടെയെത്തുന്നവരുടേയും ആവശ്യം.
