സിലിഗുരി: ശവപ്പെട്ടിയില് മയക്കുമരുന്ന് കടത്തിയ നാല് പേര് പിടിയില്. സിലിഗുരിയില് ആംബുലന്സില് സൂക്ഷിച്ച ശവപ്പെട്ടിയില് മയക്കുമരുന്ന് കടത്തിയതിന് ഒരു സ്ത്രീ ഉള്പ്പെടെ നാല് പേരെയാണ് പശ്ചിമ ബംഗാള് പോലീസിന്റെ പ്രത്യേക ടാസ്ക് ഫോഴ്സ് (എസ്ടിഎഫ്) ചൊവ്വാഴ്ച അറസ്റ്റ് ചെയ്തത്. ശവപ്പെട്ടിയില് കിടത്തിയിരുന്ന മരിച്ചയാളുടെ ബന്ധുക്കളായി ആള്മാറാട്ടം നടത്തുകയായിരുന്നു പ്രതികള്. സമീര് ദാസ് (28), അപൂര്വ ഡേ (54), പപ്പു മോദക് (31), സരസ്വതി ദാസ് (34) എന്നിവരാണ് പിടിയിലായത്.
കള്ളക്കടത്ത് നടത്തിയ ആംബുലന്സിലെ ശവപ്പെട്ടിയില് നിന്ന് 64 കിലോ കഞ്ചാവ് കണ്ടെടുത്തു. ആംബുലന്സും ശവപ്പെട്ടിയും എസ്ടിഎഫ് പിടിച്ചെടുത്തു. നിരോധിത മയക്കുമരുന്ന് ത്രിപുരയില് നിന്ന് അസം, പശ്ചിമ ബംഗാള് വഴി ബിഹാറിലേക്ക് ആംബുലന്സില് കടത്തുന്നതിനിടെയാണ് സിലിഗുരിയിലെ ഫുല്ബാരി മേഖലയില് വച്ച് ഇന്ന് രാവിലെ ഒമ്പത് മണിയോടെ ഇവരെ പിടികൂടിയത്.
