ചന്ദ്രാപുർ : മഹാരാഷ്ട്രയിലെ ചന്ദ്രാപുരിൽ വനമേഖലയിൽ വെച്ച് കടുവയുടെ ആക്രമണത്തിൽ നാല് സ്ത്രീകൾ കൊല്ലപ്പെട്ടു. ചിന്ത്യവാഹി താലൂക്കിലെ പവൻപൂർ വനമേഖലയിൽ ഇന്നലെയാണ് നാടിനെ നടുക്കിയ ഈ സംഭവം ഉണ്ടായത്. ബീഡി നിർമ്മാണത്തിനുള്ള ടെണ്ടു ഇലകൾ ശേഖരിക്കാനായി വനത്തിലേക്ക് പോയ 13 പേരടങ്ങുന്ന സ്ത്രീകളുടെ സംഘത്തിന് നേരെയാണ് ആക്രമണമുണ്ടായത്. രാവിലെ എട്ട് മണിയോടെ വനത്തിനുള്ളിൽ വെച്ച് കടുവ ഇവരെ ആക്രമിക്കുകയായിരുന്നു.
സംഘത്തിലുണ്ടായിരുന്ന ചിലർ ഓടി രക്ഷപ്പെട്ടെങ്കിലും നാല് പേർക്ക് കടുവയുടെ ആക്രമണത്തിൽ നിന്ന് രക്ഷപെടാനായില്ല. ആക്രമണത്തിന് ശേഷം കടുവ വനത്തിനുള്ളിലേക്ക് തന്നെ പോയതായി അവർ പറഞ്ഞു. സംഭവത്തെത്തുടർന്ന് വനം വകുപ്പ് ഉദ്യോഗസ്ഥർ സ്ഥലത്തെത്തി തിരച്ചിൽ ആരംഭിച്ചിട്ടുണ്ട്. കടുവയെ പിടികൂടുന്നത് വരെ ആരും വനമേഖലയിലേക്ക് പ്രവേശിക്കരുതെന്ന് വനം വകുപ്പ് കർശന നിർദ്ദേശം നൽകി. കൊല്ലപ്പെട്ടവരുടെ കുടുംബങ്ങൾക്ക് മഹാരാഷ്ട്ര സർക്കാർ 25,000 രൂപ അടിയന്തര ധനസഹായം പ്രഖ്യാപിച്ചിട്ടുണ്ട്.
