മൂന്നാര് : വ്യവസായി ആണെന്നു തെറ്റിദ്ധരിപ്പിച്ച് വന്തുക തട്ടിയെന്ന കേസില് പ്രതി അറസ്റ്റില്. മണ്ണാര്ക്കാട് കണ്ടമംഗലം ചോലക്കല് എ.കുഞ്ഞുമുഹമ്മദ് (31) ആണ് പിടിയിലായത്. മൂന്നാര് എസ്എച്ച്ഒ കെ.പി മനേഷും സംഘവും മലപ്പുറത്തുനിന്നാണു പ്രതിയെ പിടികൂടിയത്. മൂന്നാറിലെ മൊബൈല് സ്ഥാപന ഉടമയായ ജുനൈദ് റഹ്മാന്റെ പരാതിയിലാണ് അറസ്റ്റ്. പോലീസ് പറയുന്നത് കഴിഞ്ഞ ഡിസംബറില് ആഡംബര കാറില് പല തവണ കടയിലെത്തിയാണ് ഇയാള് ജുനൈദുമായി സൗഹൃദം സ്ഥാപിച്ചത്. പള്ളിവാസലില് റിസോര്ട്ട് വാങ്ങാന് വന്നതാണെന്നു പറഞ്ഞ് ഒന്നേകാല് ലക്ഷം രൂപയുടെ മൊബൈല് ആവശ്യപ്പെട്ടു. ഇയാളുടെ കൈവശമുള്ള 2 മൊബൈലുകള് പകരം തരാമെന്നും കടയിലെ മൊബൈലും 30,000 രൂപയും നല്കണമെന്നുമായിരുന്നു ഡിമാന്ഡ്.
ജുനൈദ് മൊബൈലും പണവും കൈമാറി. മൊബൈലുകള് ഹോട്ടല് മുറിയില് നിന്നെടുത്ത് മാനേജര് വശം കൊടുത്തയയ്ക്കാമെന്നു പറഞ്ഞെങ്കിലും കുഞ്ഞുമുഹമ്മദ് പിന്നീടു മുങ്ങി. പള്ളിവാസലിലെ ഒരു റിസോര്ട്ട് വാങ്ങാമെന്നു വാഗ്ദാനം ചെയ്ത് കുഞ്ഞുമുഹമ്മദ് ഭാര്യയ്ക്കും മകനുമൊപ്പം 92 ദിവസം അവിടെ താമസിച്ചതായും വാടകയിനത്തില് 2.91 ലക്ഷം രൂപ നല്കാനുള്ളതായും പോലീസ് പറയുന്നു. രാജാക്കാട് ഏലം എസ്റ്റേറ്റ് വാങ്ങാനെന്ന പേരില് ഇടനിലക്കാരനെ കബളിപ്പിച്ച് 5 ലക്ഷവും തട്ടി. എസ്ഐ ഷാഹുല് ഹമീദ്, ഗ്രേഡ് എസ്ഐ കെ.ഡി ചന്ദ്രന്, സിപിഒമാരായ വേണുഗോപാല് പ്രഭു, ടോണി ചാക്കോ എന്നിവരും പോലീസ് സംഘത്തിലുണ്ടായിരുന്നു. പ്രതിയെ ദേവികുളം കോടതി റിമാന്ഡ് ചെയ്തു.
