പാലക്കാട് : റെയില്‍വേയില്‍ ഉദ്യോഗസ്ഥനെന്ന് കള്ളം പറഞ്ഞ് വിവാഹ തട്ടിപ്പ് നടത്തിയിരുന്ന യുവാവ് അറസ്റ്റില്‍. പാലക്കാട്, തൃശൂര്‍, എറണാകുളം ജില്ലകളില്‍ നിന്നായി അഞ്ചു സ്ത്രീകളെ വിവാഹം കഴിക്കുകയും പണവും സ്വര്‍ണവും കൈക്കലാക്കി ഉപേക്ഷിക്കുകയും ചെയ്ത സംഭവത്തില്‍ ചെന്നൈ സ്വദേശി സുജീഷിനെയാണ് ഹേമാംബിക നഗര്‍ പോലീസ് അറസ്റ്റ് ചെയ്തത്. സുജീഷിനെയും പിതാവിനെയും നേരത്തെ റെയില്‍വേയില്‍ ജോലി വാഗ്ദാനം ചെയ്തുള്ള തട്ടിപ്പിലും പോലീസ് അറസ്റ്റ് ചെയ്തിരുന്നു.
അഞ്ച് കുടുംബങ്ങള്‍ നാമാവശേഷമാക്കി ആറാമത്തെയാളെ കുരുക്കാന്‍ തുടങ്ങുന്നതിനിടെയാണ് പോലീസ് പിടിയിലായത്. അകത്തേത്തറ സ്വദേശിനിയുെട പരാതിയിലായിരുന്നു ഹേമാംബിക നഗര്‍ പോലീസിന്റെ നടപടി. ചെന്നൈയില്‍ താമസിച്ച്‌ പത്ത് വര്‍ഷത്തിലേറെയായി സമാന തട്ടിപ്പ് നടത്തുന്നുവെന്നാണ് പോലീസ് പറയുന്നത്. പണം വാങ്ങിയവരെ റെയില്‍വേയുെട ചെന്നൈയിലെ ഓഫിസില്‍ നിരവധി തവണ എത്തിച്ച്‌ ഇരുവരും വട്ടം കറക്കിയിട്ടുണ്ട്. വിവാഹ തട്ടിപ്പിലും ജോലി വാഗ്ദാനത്തിലെ പണം കബളിപ്പിക്കലിലും ഇവര്‍ക്ക് കൂടുതല്‍ പങ്കുണ്ടോ എന്ന കാര്യം പോലീസ് വിശദമായി പരിശോധിക്കും.
