കൊല്ലം : ജില്ല കോടതി മജിസ്ട്രേറ്റി‍െന്‍റ പേരില്‍ വ്യാജ ഉത്തരവുണ്ടാക്കി മുംബൈ സ്വദേശിനിയെ കബളിപ്പിച്ച്‌ മൂന്നുലക്ഷം രൂപ കൈക്കലാക്കിയ തട്ടിപ്പുകാരന്‍ അറസ്റ്റില്‍. മഹാരാഷ്ട്ര പന്‍വേല്‍ സ്വദേശിയായ അര്‍മന്‍ സഞ്ജയ് പവാര്‍ (26) ആണ് കൊല്ലം വെസ്റ്റ് പോലീസി‍ന്റെ പിടിയിലായത്. വക്കീലാണെന്ന് തെറ്റിദ്ധരിപ്പിച്ചായിരുന്നു തട്ടിപ്പ്. കൊല്ലം തങ്കശ്ശേരിയില്‍ വേരുകളുള്ള പരാതിക്കാരിയുടെ അമ്മക്ക് അവരുടെ സഹോദരി ഇഷ്ടദാനമായി നല്‍കിയ സ്വത്ത്, അമ്മ മരിച്ചതോടെ തനിക്ക് ലഭിക്കുന്നതിന് യുവതി നടത്തിയ ശ്രമങ്ങളാണ് തട്ടിപ്പുകാരന്‍ മുതലാക്കിയത്. മുംബൈയില്‍ താമസക്കാരിയായ യുവതിയും ഭര്‍ത്താവുമായി പരിചയപ്പെട്ട പ്രതി അമ്മയുടെ പേരിലുള്ള വസ്തുവി‍ന്റെ അവകാശം കോടതി ഉത്തരവിലൂടെ വാങ്ങി നല്‍കാമെന്ന് വിശ്വസിപ്പിച്ച്‌ മൂന്ന് ലക്ഷം രൂപ വാങ്ങിയെടുത്തു.
തുടര്‍ന്ന് ഇയാള്‍ കൊല്ലത്തെത്തി വിവിധ അഭിഭാഷകരുടെ സഹായം തേടിയെങ്കിലും ആരും പിന്തുണച്ചില്ല. ഇതോടെ കൊല്ലം ജില്ല കോടതി മജിസ്ട്രേറ്റി‍ന്റെ പേരില്‍ വ്യാജ ഉത്തരവ് നിര്‍മിച്ചുനല്‍കി കബളിപ്പിക്കുകയായിരുന്നു. ഈ ഉത്തരവുമായി യുവതി രജിസ്ട്രാര്‍ ഓഫിസിലും കോടതിയിലും എത്തിയപ്പോഴാണ് വ്യാജമാണെന്ന് അറിയുന്നത്. തുടര്‍ന്ന് തിരിച്ചുപോയ ഇവര്‍ ഇ-മെയിലിലൂടെ കൊല്ലം വെസ്റ്റ് പോലീസ് സ്റ്റേഷനില്‍ പരാതിനല്‍കി. അന്വേഷണത്തില്‍ പ്രതി മഹാരാഷ്ട്രയിലേക്ക് കടന്നതായി വ്യക്തമായതോടെ അവിടേക്ക് അന്വേഷണം വ്യാപിപ്പിച്ചു. വെസ്റ്റ് പോലീസ് സംഘം മുംബൈയിലെത്തി അന്വേഷണം നടത്തിയെങ്കിലും പ്രതി മൊബൈല്‍ നമ്പറും താമസസ്ഥലവും ഇടക്കിടക്ക് മാറിക്കൊണ്ടിരുന്നതിനാല്‍ കണ്ടെത്താന്‍ കഴിഞ്ഞില്ല.
തുടര്‍ന്ന് കൊല്ലം സിറ്റി സൈബര്‍ സെല്ലി‍ന്റെ സഹായത്തോടെ നടത്തിയ അന്വേഷണത്തില്‍ ഇയാള്‍ ഉംറോളി എന്ന സ്ഥലത്ത് വനമേഖലക്കടുത്തുള്ള പാറമടയില്‍ ഒളിച്ച്‌ താമസിക്കുന്നതായി മനസ്സിലാക്കി അവിടെ എത്തി സാഹസികമായി അറസ്റ്റ് ചെയ്യുകയായിരുന്നു. മുംബൈ മജിസ്ട്രേറ്റിന് മുന്നില്‍ ഹാജരാക്കി അനുമതി വാങ്ങിയാണ് കൊല്ലത്തെത്തിച്ചത്. പ്രതിയെ കൊല്ലം ജുഡീഷ്യല്‍ ഫസ്റ്റ് ക്ലാസ് കോടതിയില്‍ ഹാജരാക്കി റിമാന്‍ഡ് ചെയ്തു. കൊല്ലം സിറ്റി പോലീസ് കമീഷണര്‍ ടി. നാരായണ‍ന്റെ നിര്‍ദേശപ്രകാരം കൊല്ലം എ.സി.പി ജി.ഡി. വിജയകുമാറി‍ന്റെ മേല്‍ നോട്ടത്തില്‍ കൊല്ലം വെസ്റ്റ് എസ്.ഐ കെ.ജി ശ്യാംകുമാര്‍, എസ്.സി.പി.ഒ അബൂതാഹിര്‍, സി.പി.ഒ അനീഷ് എന്നിവരടങ്ങിയ സംഘമാണ് മുംബൈയില്‍ അന്വേഷണം നടത്തി പ്രതികളെ പിടികൂടിയത്.
