തിരുവനന്തപുരം : സംസ്ഥാനത്ത് 1600 ഔട്ട്ലെറ്റുകള് വഴി 87 ലക്ഷം കുടുംബങ്ങള്ക്ക് ഭക്ഷ്യധാന്യങ്ങളുടെ കിറ്റ് വിതരണം ചെയ്യുമെന്ന് ഭക്ഷ്യമന്ത്രി പി തിലോത്തമന് അറിയിച്ചു. സംസ്ഥാനത്ത് മൂന്ന് മാസത്തേക്ക് വേണ്ടുന്ന ധാന്യം സംഭരിക്കുന്നതിനുള്ള നടപടികള് സര്ക്കാര് ആരംഭിച്ചുകഴിഞ്ഞതായും അദ്ദേഹം വ്യക്തമാക്കി .
ഏപ്രില് ഒന്ന് മുതല് സൗജന്യ റേഷന് വിതരണം ചെയ്ത് തുടങ്ങും. 15 കിലോ സൗജന്യ ഭക്ഷ്യധാന്യം ഏപ്രില് 20 ന് മുന്പ് വാങ്ങണം. അതിന് ശേഷം കേന്ദ്രത്തിന്റെ വാഗ്ദാന പ്രകാരമുള്ള ഭക്ഷ്യധാന്യം എത്തിക്കുന്നതിനുള്ള നടപടികള് സ്വീകരിക്കും. രാവിലെ മുന്ഗണനാ വിഭാഗങ്ങള്ക്കും ഉച്ചക്ക് ശേഷം മുന്ഗണനേതര വിഭാഗങ്ങള്ക്കും റേഷന് വിതരണം നടത്തും – മന്ത്രി പറഞ്ഞു .
റേഷന് കാര്ഡ് ഇല്ലാത്തവര്ക്കും റേഷന് വിതരണം ചെയ്യുമെന്ന് മുഖ്യമന്ത്രി നേരത്തെ അറിയിച്ചിരുന്നു. അവര്ക്ക് അതാത് കുടുംബത്തിലെ മുതിര്ന്ന അംഗം സത്യവാങ്മൂലം നല്കിയാല് മതിയാകും. ഇതില് ആധാര് നമ്പര്, ഫോണ് നമ്പര് എന്നിവ രേഖപ്പെടുത്തിയിരിക്കണം. അതേ സമയം കിറ്റ് ആവശ്യമില്ലാത്തവര്ക്ക് സര്ക്കാരിന് തിരികെ നല്കാമെന്നും അദ്ദേഹം വ്യക്തമാക്കി.