ന്യൂഡല്ഹി : മണിപ്പൂരില് വീണ്ടും സംഘര്ഷം. ജനക്കൂട്ടത്തെ പിരിച്ചുവിടാന് സിആര്പിഎഫ് നടത്തിയ വെടിവെപ്പില് രണ്ട് പേര് കൊല്ലപ്പെട്ടു. ബിഷ്ണുപൂരില് ബിഎസ്എഫ് ജവാന്റെ മക്കളുടെ മരണത്തിന് പിന്നാലെയാണ് വ്യാപക സംഘര്ഷമുണ്ടായത്. സംഘര്ഷത്തില് 30-ഓളം പേര്ക്ക് പരിക്കേറ്റതായാണ് വിവരം. പിന്നാലെ, ജനക്കൂട്ടം സിആര്പിഎഫ് ക്യാമ്പിലേക്ക് ഇരച്ചുകയറി. കുട്ടികള് കൊല്ലപ്പെട്ട കേസ് എന്ഐഎക്ക് കൈമാറുമെന്ന് മുഖ്യമന്ത്രി അറിയിച്ചു. ഇന്ന് പുലര്ച്ചെയുണ്ടായ ബോംബാക്രമണത്തിലാണ് മണിപ്പൂരില് രണ്ട് കുട്ടികള് കൊല്ലപ്പെട്ടത്. മൊയ്രാങ് ട്രോങ്ലോബിയിലെ ജനവാസ മേഖലയിലാണ് സംഭവം. അക്രമികള് തൊടുത്തുവിട്ട ബോംബ് വീടിന് മുകളില് വീണ് പൊട്ടിത്തെറിക്കുകയായിരുന്നു. അഞ്ച് വയസ്സുകാരനും ആറ് മാസം പ്രായമുള്ള പെണ്കുഞ്ഞുമാണ് ദാരുണമായി കൊല്ലപ്പെട്ടത്. ആക്രമണത്തിന് പിന്നില് കുക്കി വിഘടനവാദികളാണെന്നാണ് പ്രാഥമിക നിഗമനം.
അതേസമയം, ഇംഫാല് ഈസ്റ്റ് ജില്ലയിലെ ദുരിതാശ്വാസ ക്യാമ്പില് കഴിഞ്ഞിരുന്ന ഏഴ് വയസ്സുകാരിയെയും ഇന്ന് മരിച്ച നിലയില് കണ്ടെത്തിയിരുന്നു. കഴിഞ്ഞ ഞായറാഴ്ച മുതല് കാണാതായ കുട്ടിക്കായി പോലീസ് വ്യാപകമായി തിരച്ചില് നടത്തിവരികയായിരുന്നു. പെണ്കുട്ടിയുടെ മരണവാര്ത്ത പുറത്തുവന്നതോടെ ദുരിതാശ്വാസിലെ അന്തേവാസികള് പ്രതിഷേധവുമായി തെരുവിലിറങ്ങി. സംസ്ഥാനത്ത് വീണ്ടും അക്രമങ്ങള് പൊട്ടിപ്പുറപ്പെടാനുള്ള സാധ്യത കണക്കിലെടുത്ത് സുരക്ഷാ പട്രോളിങ് ശക്തമാക്കിയിട്ടുണ്ട്.
